O‘zbekistonlik yosh futbolchi qizlar Markaziy Osiyoda tengsiz, omadsiz Daniya va shaffof “Paxtakor”. Eng so‘nggi sport yangiliklari

Dunyo va o‘zbek sportiga oid 18-iyun tongining muhim xabarlari dayjesti bilan tanishing.

O‘zbekiston

Toshkent shahar hokimi Jahongir Ortiqxo‘jayev “Paxtakor” futbol klubi vakillari bilan uchrashdi. Ortiqxo‘jayev bundan keyin “Paxtakor” klubi faoliyati va moliyaviy hisobotlari shaffoflik, ochiqlik tizimida yo‘lga qo‘yilishini ta’kidlagan. Endilikda futbolchilar ishlab topadigan mablag‘lar, mukofot pullari va boshqa hisobotlar klub rasmiy manbalarida e’lon qilib boriladi. Qayd etilishicha, klubning futbolchilar, murabbiylar va xodimlar maoshi borasidagi qarzdorligini yopish uchun homiylar hisobidan 22 milliard so‘m ajratilgan.

O‘zbekistonlik futbolchi qizlar Markaziy Osiyoda tengsiz. Tojikistonda o‘tgan ayollar o‘rtasidagi CAFA U-20 musobaqasi yakunlandi. Unda O‘zbekiston U-20 jamoasi 3 ta g‘alaba va bitta durang bilan umumiy hisobda birinchi o‘rinni egalladi. So‘nggi turda o‘zbekistonlik qizlar Tojikistonni 7:1 hisobida taslim etdi.

Jahon

Yevro—2020 ning ikkinchi turidan o‘rin olgan bir qator o‘yinlar 17-iyun kuni bo‘lib o‘tdi. Ukraina terma jamoasi Makedoniyani mag‘lub etgan bo‘lsa, Belgiya Daniya ustidan irodali g‘alabani qo‘lga kiritdi. Niderlandiya esa Avstriyaga imkon qoldirmadi.

Daniya terma jamoasi ortda qolgan ikkita o‘yinda darvoza tomon 43 ta zarba berdi va faqat bitta gol urdi. Jamoa so‘nggi turda Rossiyaga qarshi bahs olib boradi. Daniyaning birgina goli Yusuf Poulsen tomonidan 99-soniyada kiritildi. Bu musobaqa tarixidagi eng tezkor ikkinchi gol hisoblanadi. Rekord muallifi Dmitriy Kirichenko — rossiyalik futbolchi Yevro—2004 da Gretsiya darvozasini 65-soniyada ishg‘ol qilgandi.

Belgiya va Daniya terma jamoalari o‘rtasidagi o‘yin 10-daqiqada qisqa muddatga to‘xtatildi. Hakamning hushtagidan keyin o‘yinda tanaffus yuzaga keldi, bu vaqtda jamoalar va tomoshabinlar birgalikda qarsak chalib turdi. Shu tariqa ular yurak to‘xtashini boshdan kechirgan Kristian Eriksenni qo‘llab-quvvatladi.

Transfer yangiliklari

“Real” “Roma” futbolchisi Leonardo Spinatssolaga qiziqish bildirmoqda, deya xabar qilmoqda Nikolo Skira. Madridliklar himoyachi uchun “Roma”ga Borxa Mayoralni berishga tayyor, biroq rimliklarni bu shart qiziqtirmayapti. “Roma” futbolchini 30 million yevroga baholamoqda.

Ramos “PSJ”ga o‘tishi mumkin. Futbolchining agentlari parijliklar bilan bog‘langan. 35 yoshli futbolchi “PSJ” eng qulay variant bo‘lib turibdi. Jamoa murabbiy Maurisio Pochettino ispancha gapiradi, Parijdan Madridgacha bo‘lgan parvoz 1 soat vaqtni oladi, shuningdek, Fransiya soliq tomondan qulay mamlakat hisoblanadi. Bundan tashqari Parij klubi Tiago Silva ketgach yangi markaziy himoyachiga ehtiyoj sezmoqda.

Eshli Yang APLga qaytdi

Angliyalik futbolchi “Inter”ni erkin agent maqomida tark etdi va “Aston Villa” safiga qaytdi. Tomonlar bir yillik shartnoma imzolagan. Yang 2011-yilda “Aston Villa”dan “Manchester Yunayted”ga o‘tgandi.