Дунё ва ўзбек спортига оид 18 июнь тонгининг муҳим хабарлари дайжести билан танишинг.
Ўзбекистон
Тошкент шаҳар ҳокими Жаҳонгир Ортиқхўжаев «Пахтакор» футбол клуби вакиллари билан учрашди. Ортиқхўжаев бундан кейин «Пахтакор» клуби фаолияти ва молиявий ҳисоботлари шаффофлик, очиқлик тизимида йўлга қўйилишини таъкидлаган. Эндиликда футболчилар ишлаб топадиган маблағлар, мукофот пуллари ва бошқа ҳисоботлар клуб расмий манбаларида эълон қилиб борилади. Қайд этилишича, клубнинг футболчилар, мураббийлар ва ходимлар маоши борасидаги қарздорлигини ёпиш учун ҳомийлар ҳисобидан 22 миллиард сўм ажратилган.
Ўзбекистонлик футболчи қизлар Марказий Осиёда тенгсиз. Тожикистонда ўтган аёллар ўртасидаги CАФА U-20 мусобақаси якунланди. Унда Ўзбекистон U-20 жамоаси 3 та ғалаба ва битта дуранг билан умумий ҳисобда биринчи ўринни эгаллади. Сўнгги турда ўзбекистонлик қизлар Тожикистонни 7:1 ҳисобида таслим этди.
Жаҳон
Евро—2020 нинг иккинчи туридан ўрин олган бир қатор ўйинлар 17 июнь куни бўлиб ўтди. Украина терма жамоаси Македонияни мағлуб этган бўлса, Бельгия Дания устидан иродали ғалабани қўлга киритди. Нидерландия эса Австрияга имкон қолдирмади.Дания терма жамоаси ортда қолган иккита ўйинда дарвоза томон 43 та зарба берди ва фақат битта гол урди. Жамоа сўнгги турда Россияга қарши баҳс олиб боради. Даниянинг биргина голи Юсуф Поульсен томонидан 99-сонияда киритилди. Бу мусобақа тарихидаги энг тезкор иккинчи гол ҳисобланади. Рекорд муаллифи Дмитрий Кириченко — россиялик футболчи Евро—2004 да Греция дарвозасини 65-сонияда ишғол қилганди.
Бельгия ва Дания терма жамоалари ўртасидаги ўйин 10-дақиқада қисқа муддатга тўхтатилди. Ҳакамнинг ҳуштагидан кейин ўйинда танаффус юзага келди, бу вақтда жамоалар ва томошабинлар биргаликда қарсак чалиб турди. Шу тариқа улар юрак тўхташини бошдан кечирган Кристиан Эриксенни қўллаб-қувватлади.
Трансфер янгиликлари
«Реал» «Рома» футболчиси Леонардо Спинаццолага қизиқиш билдирмоқда, дея хабар қилмоқда Николо Скира. Мадридликлар ҳимоячи учун «Рома»га Борха Майорални беришга тайёр, бироқ римликларни бу шарт қизиқтирмаяпти. «Рома» футболчини 30 миллион еврога баҳоламоқда.
Рамос «ПСЖ»га ўтиши мумкин. Футболчининг агентлари парижликлар билан боғланган. 35 ёшли футболчи «ПСЖ» энг қулай вариант бўлиб турибди. Жамоа мураббий Маурисио Почеттино испанча гапиради, Париждан Мадридгача бўлган парвоз 1 соат вақтни олади, шунингдек, Франция солиқ томондан қулай мамлакат ҳисобланади. Бундан ташқари Париж клуби Тиаго Сильва кетгач янги марказий ҳимоячига эҳтиёж сезмоқда.
Эшли Янг АПЛга қайтди
Англиялик футболчи «Интер»ни эркин агент мақомида тарк этди ва «Астон Вилла» сафига қайтди. Томонлар бир йиллик шартнома имзолаган. Янг 2011 йилда «Астон Вилла»дан «Манчестер Юнайтед»га ўтганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)