Дунё ва ўзбек спортига оид 16 июнь тонгининг муҳим хабарлари дайжести билан танишинг.
Ўзбекистон ва футбол
Хайр, ЖЧ—2022!
Ўзбекистон терма жамоаси ЖЧ—2022 ва Осиё Кубоги—2023 қўшма саралаши доирасидаги сўнгги тур ўйинида Саудия Арабистонига қарши баҳс олиб борди. Унда Вадим Абрамов жамоаси 0:3 ҳисобида мағлуб бўлиб, ҳал қилувчи босқич йўлланмасидан қуруқ қолди.
Энг яхши иккинчи ўринлар орасида Ўзбекистон фақат Иорданиядан олдин бўлди. Тожикистон терма жамоаси ҳам Абрамов шогирдларини ортда қолдирди. Уммон, Вьетнам ва Ливан каби жамоалар эса 3-саралаш босқичида иштирок этади.
Абрамов ўйиндан ўз фикрларини билдириб ўтар экан, футболчиларни руҳий томондан тайёрлай олмагани хатоси эканини айтди ва мухлислардан узр сўради.
Хуллас, мундиал орзуси яна камида 4 йил кечиктирилди.
Жаҳон
Суперлига ғоясидан воз кечмаётган таъсисчиларга жазо қўлланилмайди
«Реал», «Барселона» ва «Ювентус» 2021/22 йилги мавсумда Чемпионлар Лигасида иштирок этади. Учала жамоа ҳам ушбу қарор ёзилган хатни УЕФАдан қабул қилиб олган.
Аввалроқ ушбу клублар Суперлига ғоясидан ҳамон воз кечмагани сабаб жазога тортилиши ва Еврокубоклардан четлатилиши мумкинлиги айтилганди. Кейинчалик таъсисчилар УЕФАни судга берганди.
Евро—2020 ҳақида
Португалия терма жамоаси 1-турда Венгрия билан баҳс олиб борди. Асабий руҳда кечган баҳсда португаллар ўйин охирига бориб, рақиб дарвозасини уч марта ишғол қилди.
Криштиану Роналдудан рекордлар. Роналду 5 марта Европа чемпионатида қатнашмоқда. Бу мусобақа рекорди ҳисобланади. У илк бор Евро—2004 да дебют қилган ва шундан бери мунтазам турнирда қатнашиб келмоқда.
Бу ўйинда Роналду Евро тарихидаги 10 ва 11-голларини урди. Бу ҳам мусобақа рекорди ҳисобланади. Бунга қадар энг яхши натижа Мишел Платинига тегишли бўлиб, франциялик собиқ футболчи 9 та гол урганди.
1-турдан кейин Роналду Ромелу Лукаку ва Патрик Шик билан биргаликда (2 тадан гол) тўпурарлар рўйхатида етакчи бўлиб турибди.
Мусобақанинг марказий ўйинида Франция ва Германия терма жамоалари ўзаро тўқнаш келди. Унда французлар Мац Ҳуммелснинг автоголи эвазига ғалабани қўлга киритди. Шу тариқа Германия Евро тарихида илк бор мусобақани мағлубият билан бошлади. Бунга қадар жамоа 1-тур ўйинларида 7 та ғалаба ва 5 та дуранг қайд этганди.
«Барселона» 2021/22 йилги мавсум учун асосий либосни намойиш қилди. У анъанавий кўк-аноррангдан иборат бўлади.
Мората «Ювентус»да қолади
Испаниялик ҳужумчи Альваро Мората яна бир мавсум Турин клуби сафида қолади. «Ювентус» футболчининг ижара шартномасини яна бир мавсумга узайтирди. Унинг трансфер ҳуқуқи «Атлетико»га тегишли.
Олич «ЦСКА»ни тарк этди
Апрель ойида Москванинг «ЦСКА» клуби бош мураббийига айланган Ивица Олич «армиячилар» бошқарувини тарк этди. Мутахассис қўл остида жамоа 9 ўйинда 4 та ғалаба, 4 та мағлубият ва битта дуранг қайд этди. Жамоа РПЛни 6-ўринда якунлаб, 20 йил деганда илк бор Еврокубокларсиз қолди.
Роналду Coca-Cola’га 4 миллиард доллар зарар келтирдими?
Криштиану Роналду матбуот анжумани вақтида Coca-Cola ичимлигини четга суриб қўйди. Шундан сўнг кўплаб нуфузли нашрлар, хусусан, Marca португалиялик футболчининг бу иши компаниянинг акцияларига таъсир қилгани ва уларнинг нархи 1,6 фоизга пасайганини хабар қилди. Нашрга кўра, компания 242 млрд доллардан 238 миллиардга арзонлаган.
Бироқ бу таҳлиллар хато экани ва Coca-Cola акцияларининг арзонлашишига бошқа ҳолатлар сабаб бўлгани маълум бўлди. Яъни акциялар нархи душанба куни жума кундагига нисбатан пастроқ бўлиши олдиндан кутилган ва ҳодиса Роналдуга оид видео чиқмасидан аввал рўй бериб бўлган. Шу тариқа Евро тарихидаги энг яхши ўйинчининг бу ҳаракати Coca-Cola акциялари нархига заррача таъсир қилмаган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)