Farg‘ona shahridagi “Xo‘jamag‘iz” mahalla fuqarolar yig‘inida yashovchi G‘anijon Odilov va Munavvarxon Odilova xonadonida biryo‘la to‘rt nafar egizak farzand — uch o‘g‘il va bir qiz dunyoga keldi. Bu haqda “Daryo” muxbiri Azizjon Ermatov xabar berdi.
Qayd etilishicha, chaqaloqlarga To‘lqinboy, Abdukarim, Abduhakim va Zilola deb ism qo‘yilgan. Odilovlar oilasida 2016 va 2018-yilda ham qiz farzandlar dunyoga kelgan.
Shifokorlarning ta’kidlashicha, chaqaloqlar sog‘lom, ular zudlik bilan jonlantirish bo‘limiga o‘tkazilgan va kerakli muolajalar qilingan.
Farg‘ona shahar FHDYo bo‘limi xodimlari chaqaloqlarga tug‘ilganlik to‘g‘risidagi guvohnomalarni tug‘ruqxonaning o‘zida sayyor tartibda topshirgan.
Ma’lum qilinishicha, 2021-yilning 1-iyun kuniga qadar Farg‘ona viloyatida 35 ming 125 nafar bola dunyoga kelgan.