Tilga kirgan Eriksen, Novak Jokovichdan tarixiy natija va JCh—2022 ga borishni maqsad qilgan Buffon. Eng so‘nggi sport xabarlari dayjesti

Dunyo va o‘zbek sportiga oid 14-iyun tongining muhim xabarlari dayjesti bilan tanishing.

Jahon

Tennis

Dunyoning birinchi raqamli raketkachisi Novak Jokovich “Rolan Garros” musobaqasi finalida Stefanos Sitsipasni mag‘lub etib (6:7, 2:6, 6:3, 6:2, 6:4), musobaqaning ikki karra (2016 va 2021-yil) chempioniga aylandi.

Qayd etish lozim, Jokovich Parijdagi musobaqa tarixida sovrin yo‘lida Rafael Nadalni mag‘lub etgan ilk chempion bo‘ldi. “Rolan Garros”ning 13 karra g‘olibi Nadal shu vaqtga qadar mazkur musobaqada ikki bor yutqazgan (Robin Sederling va Jokovichga), biroq raqiblari keyinchalik finalda imkoniyatni boy bergandi.

Shuningdek, serbiyalik tennischi “Ulkan toj” tasnifidagi musobaqalarning har birini kamida ikki martadan qo‘lga kiritgan tarixdagi uchinchi sportchi bo‘ldi. Undan avval bu ko‘rsatkichni Rod Leyver va Roy Emerson qayd etgandi.

Futbol

Yevro—2020 musobaqasining uchinchi kungi bahslari ortda qoldi. Angliya terma jamoasi Xorvatiyaning minimal hisobda mag‘lub etgan bo‘lsa, Avstriya debyutant Makedoniyani yengib, musobaqadagi ilk g‘alabasini qo‘lga kiritdi. Niderlandiya esa qiziqarli kechgan o‘yinda Ukrainani yutdi.

Ukraina Yevropa chempionati doirasida ketma-ket 6-mag‘lubiyatni qabul qilib oldi. Bu orqali jamoa Yugoslaviyaning antirekordini takrorladi. Bu seriya Yevro—2012 da Fransiya terma jamoasiga qarshi o‘yinda boshlangandi. Shundan keyin jamoa Angliya, Germaniya, Shimoliy Irlandiya, Polsha va Niderlandiyaga imkoniyatni boy berdi.

Ukrainaga qarshi o‘yinda Niderlandiya darvozasini qo‘riqlagan Marten Stekelenburg (38 yosh-u 264 kun) mazkur chempionat tarixida niderlandlarning eng yoshi katta futbolchisiga aylandi. U Edvin van der Sarning rekordini (37 yosh-u 236 kun) yangiladi.

37 yoshli Goran Pandev Makedoniya terma jamoasining Yevro final bosqichlaridagi debyut golini urdi. Goran (37 yosh-u 321 kun) Yevro tarixida eng yoshi katta gol mualliflari orsida ikkinchi bo‘ldi. Rekord Yevro—2008 da gol urgan avstriyalik futbolchi Ivitsa Vastichga tegishli. Qayd etish kerak, Pandev Yevro—2020 musobaqasining eng yaxshi katta futbolchilari top-4 ligiga kiradi.

Eriksen voqeadan keyin birinchi marta intervyu berdi

Daniya — Finlyandiya uchrashuvida yurak to‘xtashini boshdan kechirgan Kristian Eriksen o‘zining holati haqida gapirdi.

“Rahmat, men hech qachon taslim bo‘lmayman. Hozir o‘zimni yaxshi his qilyapman, biroq o‘zim bilan nima sodir bo‘lganini tushunishni istayman. Men uchun qayg‘urgan barchaga rahmat aytaman”, — deydi Eriksen.

Buffon sobiq jamoasini tanladi

Janluiji Buffon sobiq jamoasi “Parma” bilan ikki yillik shartnoma borasida muzokara olib bormoqda, deya xabar qilmoqda Fabritsio Romano. Jiji Italiya terma jamoasining uchinchi darvozaboni sifatida JCh—2022 ga yo‘l olishni maqsad qilgan. Avvalroq Buffon shu maqsad yo‘lida “Barselona”ga o‘tish variantidan voz kechgani aytilgandi.

Koutinyo APLga qaytishi mumkin

“Barselona”ning 29 yoshli futbolchisiga “Lester”dan qiziqish bo‘lmoqda. “Tulkilar” ustozi Brendan Rojers braziliyalik futbolchini o‘z jamoasida ko‘rmoqchi, deya xabar beradi Mundo Deportivo.