NASA’ning Kennedi nomidagi kosmik markazi muhandislari Floridada “Artemida-1” missiyasi doirasida insonlarni Oyga yuborishga mo‘ljallangan o‘ta og‘ir raketa-tashuvchini yig‘ishni yakunladi, deb xabar beradi IXBT.
11-iyun kuni raketaning asosiy 65 metrli bo‘lagini ikkita biroz kichik tezlashtirgichlar orasiga tushirish ishlari yakunlandi. Ta’kidlanishicha, raketaning muhim uchta elementi birinchi bor uchirish konfiguratsiyasi bilan birga yig‘ilgan.
NASA tomonidan SLS (Space Launch System) nomi ostidagi raketa ustida ishlar o‘n yillardan buyon davom etib kelayotgandi.
Yozda Orion kosmik kemasi ekipajining yangi kapsulasi SLS’ga o‘rnatiladi va “Artemida-1” missiyasi doirasida yil oxiriga borib Oy atrofida ekipajsiz sinov parvozi amalga oshiriladi. SLS va Orion kosmik kemasini yig‘ish ishlari yakunlangach, raketa uzunligi 98 metrga yetadi. NASA vakillarining ma’lum qilishicha, barchasi rejadagidek ketsa, parvoz 2021-yilning noyabrida amalga oshiriladi. Insonlarni Oyga yuborish 2023-yilga rejalashtirilgan.
Eslatib o‘tamiz, 2019-yilning sentabrida Lockheed Martin korporatsiyasi Oyga uchiriladigan Orion kosmik kemasini qurish bo‘yicha shartnomani yutib olgan edi. NASA Lockheed Martin’ga 2030-yilning 30-sentabriga qadar maksimum 12 ta kema qurish majburiyatini yuklagan. Artemis 3-5 missiyasidagi dastlabki uchta Orion kemasi 2,7 milliard dollarga baholangan.
Avvalroq NASA Oyga eltuvchi eng qisqa yo‘lni patentlagani, ayollarning Oy yuzasiga qachon chiqishi to‘g‘risida xabar berilgandi. 2020-yilning iyul oyida esa NASA va Yaponiya AQShning Oyni zabt etish borasidagi “Artemida” dasturi bo‘yicha hamkorlikda ishlash to‘g‘risidagi kelishuvni imzolagan.
Izoh (0)