To‘liq o‘lchamli pikaplar bugungi kunda har qachongidan ham yiriklashgan va og‘irlashgan, biroq buning oqibatida ular piyodalar uchun katta xavf tug‘dirmoqda, ayniqsa, bunga xavfsizlik tizimi to‘plamining “nochorligi” sabab bo‘lyapti, deb yozadi Motor.
Foto: Stellantis
Xaridorlar yirik pikaplarni ishonchli va xavfsizligi uchun xarid qilmoqda, biroq Consumer Reports nashrining yozishicha, katta o‘lchamlar, hayratlanarli massa va baland kapot piyodalar uchun jiddiy xavf tug‘diradi. 2000-yildan buyon kapot qirrasi 11 foizga, mashina og‘irligi esa 24 foizga oshgan. Bundan tashqari, to‘liq o‘lchamli pikaplar sedan va krossoverlardan ancha yirik bo‘lgani uchun, kuzovning yon tomonlarida “ko‘rinmas zonalar” mavjud. Shu bilan birga, barcha pikaplar ham avtomatik tormozlanish, piyodalarni tanish kabi tizimlarni nafaqat standart jamlanma, balki alohida opsiya sifatida ham taklif etmaydi.
Hozirgi kunda faqatgina Ford, Honda, Nissan va Toyota pikaplari bazaviy jamlanmada ushbu texnologiyalarni taklif etmoqda, General Motors va Stellantis esa 2022-yilga borib kamida favqulodda tormozlanish tizimini qo‘shishga va’da bergan. Ma’lumotlarga ko‘ra, so‘nggi o‘n yillikda piyodalarning o‘limi bilan bog‘liq yo‘l-transport hodisalari 46 foizga oshgan. Mazkur muammoni zudlik bilan yechishning imkoni yo‘q, chunki iste’molchilar yirik va og‘ir avtomobillardan voz kechishga tayyor emas. Ekspertlarning fikricha, shunga qaramay, tez orada zamonaviy xavfsizlik tizimlarini joriy etish orqali vaziyatni yaxshilash mumkin.
Eslatib o‘tamiz, 2021-yilning fevralida J.D. Power konsalting agentligi minilgan mashinalar egalari o‘rtasida har yilgi so‘rovnomasini o‘tkazib, dunyodagi eng ishonchli uch yillik avtomobillar reytingini taqdim etgandi. Yetakchilar qatoridan Lexus, Porsche va Kia markalari o‘rin olgan bo‘lsa, Land Rover, Alfa Romeo va Jaguar oxirgi pog‘onalarni band etgan.
