Amaldorlarning daromadlarini deklaratsiya qilinishini nazarda tutuvchi qonun loyihasida davlat xizmatchilarining o‘z vazifalarini bajarish vaqtida yuzaga kelishi mumkin bo‘lgan bir qator masalalar tartibga solinishi ko‘zda tutilmoqda. Bu haqda Korrupsiyaga qarshi kurashish agentligi matbuot kotibi Durdona Ochilova “Daryo”ga ma’lum qildi.
Avvalroq Korrupsiyaga qarshi kurashish agentligi “Davlat xizmatchilarining daromadlari, mol-mulkini deklaratsiya qilish va manfaatlar to‘qnashuvi to‘g‘risida”gi qonun loyihasini ishlab chiqqani haqida xabar berilgan edi. Loyihada mansabdor shaxslarning barcha daromadlari va xarajatlari deklaratsiya qilinishi nazarda tutilgan.
Mavzuga doir: O‘zbekistonda Prezidentga ham yil davomida ishlab topgan puli haqida hisobot topshirish majburiyati yuklatilishi mumkin
- davlat xizmatchilarining daromadlari va mol-mulkini deklaratsiya qilish hamda manfaatlar to‘qnashuvi sohasidagi munosabatlarni tartibga solishning umumiy qoidalari;
- davlat xizmatchilarining daromadlari va mol-mulki to‘g‘risida deklaratsiyalarni taqdim etish va ularni e’lon qilish tartibi;
- davlat xizmatida manfaatlar to‘qnashuvining oldini olish va ularni hal qilishning mexanizmlari;
- davlat xizmatchisining vazifalarini bajarish vaqtidagi taqiqlar;
- sovg‘alar olish va berish bilan bog‘liq cheklovlar.
Eslatib o‘tamiz, O‘zbekistonda 2020-yil 1-yanvardan boshlab davlat xizmatchilari ayrim toifalarining mol-mulkini, daromadlari va xarajatlarini deklaratsiyalash tizimini bosqichma-bosqich, uch yil ichida joriy etish rejalashtirilgan edi. Bu haqdagi tegishli prezident qarori loyihasi 2019-yil oktabr oyida jamoatchilik muhokamasi uchun e’lon qilingan edi.
Keyinchalik bu tizimni joriy etishning boshlanishi 2021-yil yanvariga qadar kechiktirilgani, joriy etish muddati esa besh yilgacha uzaytirilgani ma’lum bo‘ldi. Biroq 2021-yil iyun oyi holatiga ko‘ra tizim hali ham ishga tushmagan; 2021-yil martida tegishli qonun loyihasi Prezident ma’muriyatiga kiritilgani ma’lum bo‘ldi.
Qayd etish joiz, qonun loyihasida mamlakat prezidentiga ham yil davomida ishlab topgan puli haqida hisobot topshirish majburiyatini yuklash haqidagi norma kiritilgani ma’lum qilingan.
Izoh (0)