Qirg‘izistonda prezident ma’muriyatining sobiq rahbari Doniyor Narimboyev va bosh vazirning sobiq o‘rinbosari Almazbek Botirbekov hibsga olindi. Bu haqda respublika poytaxtining Pervomay tumani sudiga tayanib, “TASS” xabar berdi.
“Sudgacha olib boriladigan jarayonlar vaqtida — 2021 yil 31-iyulgacha Narimboyev va Botirbekovga nisbatan qamoqqa olish tarzidagi ehtiyot chorasi tayinlandi”, — dedi sud vakili.
Vakilning so‘zlariga ko‘ra, sobiq amaldorlar bu vaqt davomida Milliy xavfsizlik davlat qo‘mitasi tergov izolyatorida saqlanadi. Ular jinoyat kodeksining qaysi moddasi bo‘yicha gumonlanayotganiga aniqlik kiritilmagan.
Avvalroq bir qator qirg‘iz ommaviy axborot vositalarida Narimboyev va Botirbekov “Qumtor” oltin konidagi korrupsiya ishi bo‘yicha Milliy xavfsizlik davlat qo‘mitasi tomonidan so‘roqqa chaqirilgani haqida xabar berilgan edi.
Narimboyev 2012-yildan 2015-yilgacha Qirg‘iziston davlati rahbari apparatini boshqargan. 2015-yil noyabr oyida u firibgarlikda ayblanib, uch yilga hukm qilingan.
Botirbekov esa 2020-yil iyundan oktabrga qadar bosh vazirning birinchi o‘rinbosari bo‘lib ishlagan.
May oyi oxirida Qirg‘izistonda yana ikki nafar sobiq davlat amaldori korrupsiyada ayblanib hibsga olingan edi. Ulardan biri Qirg‘iziston parlamentining sobiq raisi va sobiq prezident So‘ronbay Jeenbekovning ukasi Asilbek Jeenbekovdir.
Izoh (0)