O‘zbekiston Prezidenti Shavkat Mirziyoyev 7-iyun kuni “Nogironlar huquqlari to‘g‘risidagi konvensiyani (Nyu-York, 2006-yil 13-dekabr) ratifikatsiya qilish to‘g‘risida”gi qonunni imzoladi, deb xabar beradi “Xalq so‘zi online”. Hujjat Oliy Majlis Qonunchilik palatasi tomonidan 18-mayda qabul qilingan va 29-mayda Senat tomonidan ma’qullangan edi.
Konvensiya 12-moddaga (“Qonun oldida tenglik”) quyidagicha qo‘shimcha tushuntirish va bayonot bilan qabul qilingan:
- “O‘zbekiston Respublikasi nogironligi bo‘lgan shaxs hayotning barcha jabhalarida boshqalar bilan teng ravishda huquqiy layoqatga ega ekanligini tan oladi.
- O‘zbekiston Respublikasi konvensiya nogironligi bo‘lgan shaxslarning qarorlarni qabul qilish mexanizmlarini qo‘llab-quvvatlash va o‘zgartirish kiritishlarni ta’minlash uchun tegishli choralarni ko‘rishga imkon berishini, jumladan, tegishli sharoitlarda va qonunchilikka muvofiq nogironligi bo‘lgan shaxslarning huquqiy layoqatini cheklash kerakligini tushunishini ma’lum qiladi.
- O‘zbekiston Respublikasi nogironlar uchun qarorlarini qabul qilish mexanizmlaridan foydalanishda davom etish huquqini o‘zida saqlab qoladi”.
Ma’lumot uchun, O‘zbekiston Nogironlar huquqlari to‘g‘risidagi konvensiyani 2009-yilning 27-fevralida imzolagan, biroq haligacha uni ratifikatsiya qilmagan edi. Nogironlarning nodavlat tashkilotlari vakillari uzoq vaqt davomida bir necha marta ushbu hujjatni ratifikatsiya qilishning zarurligi to‘g‘risida eslatishdi.
2017-yil oxirida Prezident Shavkat Mirziyoyev nogironligi bo‘lgan shaxslarni davlat tomonidan qo‘llab-quvvatlanishi tizimini tubdan takomillashtirish to‘g‘risidagi farmonni imzoladi. Hujjatda BMTning Nogironlar huquqlari to‘g‘risidagi konvensiyasini ratifikatsiya qilishga tayyorgarlik ko‘rish bo‘yicha amaliy choralarni ko‘rish topshirildi. Joriy yilning yanvarida O‘zbekistonda “Nogironligi bo‘lgan shaxslarning huquqlari to‘g‘risida"gi yangi qonun kuchga kirdi.
Izoh (0)