Shavkat Mirziyoyev 2-iyun kuni Termiz shahrida qurilgan ko‘p qavatli uylarni borib ko‘rdi. “Gazeta.uz”ning yozishicha, bunday turar joylar jismoniy imkoniyati cheklangan hamda “temir daftar”ga kiritilgan oilalarga imtiyozli tarzda berilmoqda. Shunday xonadonlardan biri 15 yildan beri bemorlikning sinovlarini tortgan Nazira Rahimovaga berilgan. Davlat rahbari Surxondaryoga tashrifi yakunida ushbu xonadonda bo‘ldi.

Foto: Prezident matbuot xizmati

Nazira Rahimovaning qizi Ruxshona Abdurazzoqova 2018-yili Termiz shahrida “Yosh kitobxon” respublika ko‘rik-tanlovining viloyat bosqichida 10−14 yoshgacha bo‘lgan ishtirokchilar orasida 1-o‘rinni egallab, respublika bosqichiga yo‘l olgan. U 2020-yilda “Zulfiya” nomidagi davlat mukofoti bilan taqdirlangan.

Foto: Prezident matbuot xizmati

“Shunday farzandni tarbiya qilganingiz uchun rahmat! Niyatlaringiz, qilgan halol mehnatingiz, mana oldingizdan chiqdi. Odamlar mana shunday sharoitlarda yashashiga biz hamma sharoitni yaratamiz. Xudo bergan shunday iste’dod bilan, shunday qobiliyat bilan, albatta, hamma niyatlaringiz amalga oshadi va men bitta narsani aytmoqchimanki, men siz bilan g‘ururlanaman!”, — degan Prezident Ruxshonaning onasiga.

Foto: Videodan kadr

“Lekin hech ham kutmagandim, bugun, eshik taqilladi ochsam, davlatimiz rahbari otalarcha mehr bilan kirib kelishlari meni juda ham to‘lqinlantirib yubordi. Men-ku, mayli, onajonim o‘zi betob edilar, mana shunday davlatimiz e’tiborini ko‘rib, quvonib turgan vaqtlarida davlat rahbari onam va mening holimdan xabar olgani kelganlari onamga qattiq ta’sir qildi. Nasib etsa kelajakda o‘z oldimga qo‘ygan maqsadlarimni amalda ko‘rsatib, yaxshi natijalarga erishishga astoydil harakat qilaman”, — degan Ruxshona Prezident tashrifi haqida.

Foto: Prezident matbuot xizmati

Davlat rahbari, shuningdek, yosh oilalardan biri Farrux Egamov xonadonida bo‘lib, ular bilan ham suhbatlashgan. Muloqot davomida Prezident “Surxondaryo viloyati bo‘yicha katta rejalar belgiladik. Hammasining tagida bitta narsa — inson manfaati bor. Endi bu uylarni aholiga adolatli berish kerak. Adolat bo‘lsa qadriga yetadi”, — deb aytgan.

Ma’lum qilinishicha, 2021-yilda Surxondaryo viloyatida yana 3500 kvartirali ko‘p qavatli uylar quriladi. 1460 ta oilaga ipoteka uchun subsidiya beriladi.