“Aristokratlar”ning samoviy xaridlari: “Chelsi” chempion tarkibni yig‘ish uchun qancha mablag‘ sarflagan?

Portugaliyaning Portu shahrida 29-may kuni “Chelsi” “Manchester Siti”ni minimal hisobda mag‘lub etib (1:0), Chempionlar Ligasidagi ikkinchi sovrinini qo‘lga kiritdi. Ikkala unvon ham klubning hozirgi prezidenti Roman Abramovich davrida qo‘lga kiritildi. 18 yil davomida rossiyalik milliarder jamoasi uchun talaygina pul sarflab qo‘ydi. “Championat.com” nashri “Chelsi”ning hozirgi chempion tarkibi qanchaga tushganini hisoblab chiqdi.

Qimmatbaho transferlar va iqtidorli tarbiyalanuvchilar

Chempionlar Ligasining 2020/21-yilgi mavsumida “Chelsi” 27 nafar futbolchini ro‘yxatdan o‘tkazdi. Ularning barchasi qaydnomaga kiritilib kelindi, faqatgina uch nafar futbolchi maydonga tushmadi. Bular: darvozabon Villi Kabalyero (2018-yilning yozida erkin agent sifatida jamoaga kelgan), Karlo Jiger (2017-yilning yozida “Chelsi” akademiyasiga boshqa jamoadan o‘tgan) va hozirda “Milan”da ijara asosida to‘p surayotgan Fikayo Tomori.

2020-yilning yozida Abramovich transferlar uchun samoviy pullardan voz kechdi. Quyidagi o‘yinchilar xarid qilindi:

• Eduard Mendi – “Renn”dan 24 million yevro evaziga;
• Ben Chiluell – “Lester”dan 50 million yevro evaziga;
• Kay Haverts – “Bayer”dan 80 million yevro evaziga;
• Hakim Ziyosh – “Ayaks”dan 40 million yevro evaziga;
• Timo Verner – “Leypsig”dan 53 million yevro evaziga.

“Chelsi”ning Abramovich davrida amalga oshirilgan eng qimmat xaridlari (hozirgi tarkibda borlari):

• Kepa – 80 mln yevro (“Atletik”dan sotib olingan);
• Kristian Pulishich – 64 mln yevro (“Borussiya D”);
• Jorjinyo – 57 mln yevro (“Napoli”);
• Mateo Kovachich – 45 mln yevro (“Real”);
• Antonio Ryudiger – 35 mln yevro (“Roma”);
• Ngolo Kante – 35 mln yevro (“Lester”);
• Markos Alonso – 23 mln yevro (“Fiorentina”);
• Emerson – 20 mln yevro “Roma”;
• Olivye Jiru – 17 mln yevro “Arsenal”.

Shu bilan birga “Chelsi” tarbiyalanuvchilari ham jamoaning Chempionlar Ligasidagi g‘alabasiga katta hissa qo‘shdi. Bunday o‘yinchilar qatoriga Ris Jeyms, Andreas Kristensen, Meyson Maunt, Kallum Hadson-Odoi va Temmi Abrahamni kiritish mumkin. Jamoa sardori Sesar Aspilikueta esa bir vaqtlar klubga atigi 9 million yevro tushgan.

Yuqoridagi raqamlar sarhisob qilinsa, Abramovich butun tarkibni yig‘ish uchun 647 million yevro sarflagan. Hozirda esa Transfermarkt portali jamoaning umumiy qiymatini 786,8 million yevroga baholamoqda, ya’ni 140 million yevroga ko‘proq.

Yana bir qiziqarli jihat, Tomas Tuxel o‘zi shakllantirmagan tarkib bilan ham Chempionlar Ligasida g‘alaba qozonishga muvaffaq bo‘ldi. Uning talabiga binoan Abramovich hali birorta ham futbolchini sotib olgani yo‘q. Tez orada yozgi transfer oynasi ochiladi, Tuxel Abramovichga yangi futbolchilarni buyurtma qilishi aniq. Bunga haqqi bor!