Amaldagi chempion Mirazizbek Mirzaxalilov Osiyo chempionati finalida mo‘g‘ulistonlik bokschiga yutqazib qo‘ydi

Boks bo‘yicha kattalar o‘rtasidagi Osiyo chempionatining final bahslari 31-may, dushanba kuni bo‘lib o‘tmoqda.

-56 kg vazn toifasidagi bokschilar o‘rtasidagi jangda Mirazizbek Mirzaxalilov mo‘g‘ulistonlik Xarku Enx-Amarga 3:2 hisobida mag‘lub bo‘ldi. Qayd etish kerak, jang mobaynida Mirzaxalilov ko‘p jabhada raqibidan ustunroq harakat qildi, biroq hakamlar qaroriga ko‘ra g‘alaba Enx-Amarga berildi.

Avvalroq Nodirjon Mirzaahmedov (-49 kg) va Shahobiddin Zoirov (-52 kg) finalni g‘alaba bilan yakunlab, Osiyo chempionligini qo‘lga kiritgandi.

Ma’lumot uchun, Mirazizbek amaldagi Jahon va Osiyo chempioni hisoblanadi. O‘zbekistonlik bokschi 2019-yilda Bankokda o‘tkazilgan Osiyo birinchiligi va Yekaterinburgdagi Jahon chempionatida oltin medalga ega chiqqandi. Shuningdek, u 2018-yilgi Osiyo o‘yinlari chempioni hisoblanadi.