Nukusda BAA fondi 27 mln dollarga 100 kishilik shifoxona quradi

Qoraqalpog‘istonning Nukus shahrida BAA Xalifa bin Bin Zoid Ol Naxayon nomidagi xayriya jamg‘armasi grant mablag‘lari hisobidan zamonaviy ona va bola shifoxonasi barpo etiladi. Bu haqda Investitsiyalar va tashqi savdo vazirligi matbuot xizmati xabar berdi.

Mablag‘lar ajratish O‘zbekistonda ijtimoiy loyihalarni amalga oshirishga BAA Xalifa bin Bin Zoid Ol Naxayon nomidagi xayriya jamg‘armasining texnik ko‘magini jalb etish bo‘yicha BAA va O‘zbekiston o‘rtasida hamkorlik to‘g‘risidagi hukumatlararo bitimda ko‘zda tutilgan.

Hujjat 26-may kuni videokonferensiya shaklida O‘zbekiston investitsiyalar va tashqi savdo vazirining o‘rinbosari Shuhrat Vafoyev va BAA moliya vazirining o‘rinbosari Yunis Hoji Al-Xuriy tomonidan imzolangan.

Xabarda aytilishicha, loyihaning umumiy qiymati 27 million dollarni tashkil etadi va moliyalashtirilishi to‘liq Xalifa bin Bin Zoid Ol Naxayon jamg‘armasining grant mablag‘lari hisobidan amalga oshiriladi.

Yangi shifoxona 100 bemorga mo‘ljallangan. U dizayn va texnik jihozlari bo‘yicha hududda yagona bo‘lgan to‘g‘ruqoldi va tug‘ruq bo‘limlari, onalar va yangi tug‘ilgan chaqaloqlar uchun palatalar, onalar va bolalar intensiv terapiyasi bo‘limlari, jarrohlik bo‘limi, shifoxona, ambulatoriya va maslahat diagnostika bo‘limlari hamda laboratoriyalarga ega bo‘ladi.

Ayni paytda obyektda qurilish ishlari boshlangan. 2022-yil yakuniga qadar uning to‘liq qurib bitkazilishi kutilmoqda.

Avvalroq Qoraqalpog‘iston tug‘ruqxonalariga YuNISEF va UNFPA tomonidan 1 million dollarlik tibbiy asbob-uskunalar sovg‘a qilingani haqida xabar berilgan edi.