Rossiya Federatsiyasi tarkibiga kiruvchi Yoqutiston (Saxa) Respublikasi hududlari ichida birinchi bo‘lib majburiy emlash joriy etgani haqida e’lon qildi, deb yozadi Meduza.

Foto: “RIA Novosti”

Respublika rasmiy axborot portali xabariga ko‘ra, Yoqutiston rahbari Aysen Nikolayev munitsipalitetlar va shahar okruglari rahbarlariga tegishli me’yoriy hujjatlarni ishlab chiqishni buyurdi.

Qayd etilishicha, avvalambor, bolalar yozgi ta’tilini tashkil etish bilan shug‘ullanadigan ta’lim sohasi xodimlari va respublika miqyosidagi ommaviy tadbirlarni o‘tkazishda ishtirok etadigan xodimlar koronavirusga qarshi emlanishga majbur bo‘ladi. Emlashdan asossiz ravishda bosh tortgan xodimning ishlashiga yo‘l qo‘yilmasligi mumkin.

Majburiy vaksinatsiyani amalga oshirmagan ish beruvchilar 200 ming rubl (2 727 dollar) va undan ortiq miqdorda jarimaga tortiladi. Bunday jarimalar barcha mulk shakllaridagi korxonalar, shu jumladan, respublikada faoliyat ko‘rsatayotgan xususiy kompaniyalar va federal tuzilmalar uchun ham amal qiladi.

19-may kuni respublika bosh sanitariya shifokori Margarita Ignatyeva tegishli buyruqni imzoladi, unga ko‘ra, Yoqutistonning 60 yoshdan oshgan aholisi, surunkali kasalliklarga chalingan kishilar, yirik aholi punktlari aholisi, harbiy xizmatchilar, huquqni muhofaza qilish organlari xodimlari, xizmat ko‘rsatish sohasi va uy-joy kommunal xizmatlari xodimlari, ko‘ngillilar va smenali ishchilar, davlat va kommunal xizmatchilar, o‘rta va oliy o‘quv yurtlarida o‘qiyotgan 18 yoshdan katta shaxslar koronavirusga qarshi emlanishi shart.

Buyruqda aytilishicha, yuqumli kasalliklarga chalinish xavfi yuqori bo‘lgan shaxslar emlanmagan taqdirda ular o‘qishga qabul qilinmasligi yoki ish faoliyati to‘xtatib qo‘yilishi mumkin.

Ushbu ma’lumot ommaviy axborot vositalarida keng tarqalganidan so‘ng, Yoqutiston rasmiylari press-relizdagi so‘zlarni yumshatdi: endi mintaqa aholisini “majburiy” emlash emas, balki “ommaviy” emlashni ta’minlash haqida so‘z boradi. Yoqutiston bosh sanitariya shifokori aniqlik kiritishicha, agar ish beruvchining tegishli buyrug‘i bo‘lsa, xodimlar emlash markaziga kelishi shart, ammo o‘sha yerda xabardor qilingan holda emlanishdan bosh tortishni rasmiylashtirishi mumkin bo‘ladi.