Yevropa top-5 ligalari klublari maoshlarga qancha mablag‘ sarflayotgani ma’lum bo‘ldi

UEFA Yevropa futbol klublari maoshlarga qancha mablag‘ sarflashini hisoblab chiqdi.

O‘rtacha hisobda Yevropa klublari budjetning 64 foizini maoshlarga sarflaydi. Shulardan 49 foizi futbolchilar maoshiga ketadi (tarixdagi rekord ko‘rsatkich), 15% — qolgan xodimlarga.

Angliya Premyer Ligasi klublari maoshlarga 3,615 milliard yevro (budjetning 62 foizi) sarflaydi, futbolchilar maoshiga 2,764 milliard (76%) ketadi.

Ispaniya La Ligasi jamoalari maoshlarga sarflaydigan xarajati 2,109 mlrd yevroni (budjetning 61 foizi) tashkil etadi, futbolchilarga 1,868 mlrd yevro (89%) maosh beriladi.

Italiya A Seriyasi maoshlarga umumiy miqdorda 1,810 mlrd yevro (budjetning 70 foizi) ajratadi, o‘yinchilar 1,477 mlrd yevroni (82%) qo‘lga kiritadi.

Germaniya Bundesligasida xarajatlar 1,805 mlrd yevroga teng (budjetning 65 foizi), shuning 1,398 milliardi (77%) futbolchilarga ketadi.

Fransiya Liga 1 klublari maoshlarga 1,403 mlrd yevro (budjetning 74 foizi), futbolchilarga esa 1,031 mlrd yevro (73%) ketadi.

UEFA bu vaziyat Yevropa futboli kelajagi uchun xavfli bo‘lishidan xavotirda. Sababi daromadlar qisqargan vaqtda klublar moliyaviy majburiyatlar tufayli qarz olishga majbur bo‘ladi yoki o‘yinchi va xodimlarini maoshlarning kamayishiga ko‘ndirishiga to‘g‘ri keladi.