Davlat statistika qo‘mitasi ma’lumotlariga ko‘ra, 2021-yilning yanvar—aprel oylarida O‘zbekistonga xorijdan 156 ta elektromobil import qilingan. Bu ko‘rsatkich o‘tgan yilning mos davriga nisbatan 138 taga ko‘p.
Foto: Davlat statistika qo‘mitasi
Ma’lum qilinishicha, 2021-yilning aprel oyida 65 ta elektromobil import qilingan.
O‘zbekiston elektromobillarni asosan Xitoydan import qilgan — 119 ta. Ikkinchi o‘rinda Turkiya (24) joylashgan bo‘lsa, uchinchi pog‘onadan Janubiy Koreya va AQSh o‘rin olgan (4 tadan).
Yil boshidan buyon import qilingan elektromobillar uchun 3,4 million AQSh dollari sarflangan.
Spot’ning PlugShare ma’lumotlariga tayanib yozishicha, bugungi kunda O‘zbekistonda elektromobillar uchun 15 ta quvvatlantirish stansiyasi mavjud. Ulardan birinchisi Farg‘onada ochilgan bo‘lsa, Toshkentda butun boshli tarmoq yaratish ishlari olib borilmoqda — bu bilan TokBor va Makro shug‘ullanyapti.
2019-yildan buyon mamlakatga elektromobillarni olib kirishda imtiyozlar amal qilmoqda — bojxona boji va aksiz solig‘i to‘lanmaydi. Hozirda ularni avtotransport yig‘imidan ham ozod etish masalasi ko‘rib chiqilmoqda.
Avvalroq O‘zbekistondagi bir nechta kompaniyalar 2021—2023 yillarda avtomobillar, pikaplar, yuk mashinalari, mikroavtobuslar va boshqa avtomobillarni ishlab chiqarish va yig‘ishni yo‘lga qo‘ymoqchi ekanligi haqida xabar berilgan edi. Prezident yiliga 50-60 ming dona hamyonbop avtomobillar va elektromobillar ishlab chiqarishni yo‘lga qo‘yib, avtomobil sanoati uchun sarmoya kiritish zarurligini ta’kidlagan edi.
