Xitoyda keng bahslarga sabab bo‘lgan qonun qabul qilingach, ajrashishlar soni 70 foizga kamaydi, deb yozmoqda Tengrinews.
Xitoy Fuqarolik masalalari vazirligining ma’lumotlariga ko‘ra, 2021-yilning birinchi choragida taxminan 296 mingta ajralish ro‘yxatga olindi. 2020-yilda bu ko‘rsatkich bir milliontaga yetgan edi.
Buning sababi hukumatning 1-yanvardan joriy qilgan majburiy “o‘ylab ko‘rish” muddati bilan izohlanmoqda. Fuqarolik kodeksiga kiritilgan yangi o‘zgartirishlarga muvofiq, turmush qurgan juftlik ajrashishni rasmiylashtirishdan oldin 30 kun kutishi kerak.
Hukumat ushbu qonunni mamlakatda ajralishlar soni ko‘payib, tug‘ilish darajasi kamayishi fonida qabul qilgan edi. Agar ajrashish uchun ariza bergan juftlik vakolatli organga 30 kundan 60 kungacha qayta murojaat qilmasa, ularning murojaati bekor qilinadi. Ariza berishga oiladagi zo‘ravonlik sabab bo‘lsa, “o‘ylab ko‘rish” muddati belgilanmaydi.
Xitoyliklar yangi qonunni salbiy qabul qilib, ayniqsa, ko‘plab ayollar va yoshlar umuman turmush qurmaslik bilan tahdid qilgan. Xitoy aholisi qonun loyihasi ularning oilaviy hayotidagi erkinlikni cheklaydi, ajrashish esa endi ancha qimmatga tushadi, deb hisoblagan edi.
“Baxt uchun nikoh kerak emas, lekin ajrashish kerak. Bu ma’lumotlarga ko‘ra, 70 foiz odam baxtga erishish imkoniyatini yo‘qotgan”, — deb yozdi ijtimoiy tarmoq foydalanuvchilaridan biri.
2003-yildan buyon Xitoyda ajralishlar soni keskin ko‘paydi, bu esa demografik inqirozga olib keldi. Mutaxassislar fikriga ko‘ra, tug‘ilish darajasining pasaygani sababli asr oxiriga kelib Xitoy aholisi ikki barobarga kamayib ketishi mumkin. Bunga javoban hukumat an’anaviy qadriyatlarni targ‘ib etib, ajrashishlarning oldini olishga harakat qilmoqda.
Avvalroq Xitoy Davlat statistika boshqarmasi mamlakat aholisi 2020-yilda 0,83 foizga ko‘payib, 1 milliard 411 million 780 ming kishini tashkil etganini, 2010-yilga taqqoslaganda aholi soni 72 millionga ortganini ma’lum qilgandi. Ma’lumotlarga ko‘ra, aholining o‘rtacha yillik o‘sish sur’ati 0,53 foizni tashkil etgan. Bu ko‘rsatkich 2000—2010-yillarga nisbatan 0,04 foizga kamroq hisoblanadi.
Shuningdek, dunyoda egizaklar tug‘ilishi darajasi eng yuqori cho‘qqiga chiqqani haqida xabar berildi. Tadqiqot natijalariga ko‘ra, dunyo bo‘yicha egizaklarning tug‘ilish miqdori har 1000 ta tug‘ilishga nisbatan o‘rtacha 9 tadan 12 tagacha oshgan, lekin bu ko‘rsatkich har bir davlatda bir-biridan farq qiladi. Eng katta o‘sish Shimoliy Amerikada (71 foiz), Yevropada (60 foiz), va Osiyoda (32 foiz) kuzatilgan.
Izoh (0)