“Real” hujumchisi Karim Benzema Fransiya terma jamoasining Yevro—2020 musobaqasida ishtirok etadigan futbolchilar ro‘yxatiga kiritildi.
33 yoshli hujumchi 6 yildan buyon milliy jamoada o‘ynamayotgan edi, uning terma jamoadagi so‘nggi uchrashuvi 2015-yilning oktabrida Armanistonga qarshi bo‘lib o‘tgan bahs hisoblanadi.
Eslatib o‘tamiz, Benzema 2015-yilda jamoadoshi Matyo Valbuena bilan bo‘lgan mojarolar sabab terma jamoadan chetlatilgandi. O‘shanda noma’lum shaxslar Valbuenaning ishqiy munosabatlari tasvirlangan videoni tarqatib yuborish bilan qo‘rqitib, undan pul talab qilgan, Benzema esa jinoyatchilar va Valbuena o‘rtasida vositachi bo‘lgani gumon qilingan. Avvalroq Benzema mazkur ish yuzasidan oktabr oyida sud oldida javob berishi va aybi isbotlanadigan bo‘lsa, 5-6 yil muddatga ozodlikdan mahrum etilishi mumkinligi xabar qilingandi.
Karim aynan ushbu voqealar bilan bog‘liq vaziyat tufayli Yevro—2016 va Fransiya g‘olib bo‘lgan JCh—2018 musobaqalarini o‘tkazib yuborgan.
Benzema “Real” safida La Liga 2020/21-yilgi mavsumida 33 o‘yin o‘tkazib, 22 gol va 8 ta golli uzatma amalga oshirdi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)