«Реал» ҳужумчиси Карим Бензема Франция терма жамоасининг Евро—2020 мусобақасида иштирок этадиган футболчилар рўйхатига киритилди.
33 ёшли ҳужумчи 6 йилдан буён миллий жамоада ўйнамаётган эди, унинг терма жамоадаги сўнгги учрашуви 2015 йилнинг октябрида Арманистонга қарши бўлиб ўтган баҳс ҳисобланади.
Эслатиб ўтамиз, Бензема 2015 йилда жамоадоши Матё Вальбуэна билан бўлган можаролар сабаб терма жамоадан четлатилганди. Ўшанда номаълум шахслар Вальбуэнанинг ишқий муносабатлари тасвирланган видеони тарқатиб юбориш билан қўрқитиб, ундан пул талаб қилган, Бензема эса жиноятчилар ва Вальбуэна ўртасида воситачи бўлгани гумон қилинган. Аввалроқ Бензема мазкур иш юзасидан октябрь ойида суд олдида жавоб бериши ва айби исботланадиган бўлса, 5-6 йил муддатга озодликдан маҳрум этилиши мумкинлиги хабар қилинганди.
Карим айнан ушбу воқеалар билан боғлиқ вазият туфайли Евро—2016 ва Франция ғолиб бўлган ЖЧ—2018 мусобақаларини ўтказиб юборган.
Бензема «Реал» сафида Ла Лига 2020/21 йилги мавсумида 33 ўйин ўтказиб, 22 гол ва 8 та голли узатма амалга оширди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)