Yunusobod tumani davlat soliq inspeksiyasi katta inspektori 3,5 ming dollar pora bilan ushlandi
Toshkentda davlat soliq inspeksiyasi xodimi 3,5 ming dollar pora bilan qo‘lga tushdi. Bu haqda “O‘zbekiston 24” telekanalining “Axborot 24” dasturida ma’lum qilindi.
Qayd etilishicha, DXX, shahar prokuraturasi hamda Bosh prokuratura huzuridagi Iqtisodiy jinoyatlarga qarshi kurashish departamenti hamkorligida o‘tkazilgan tezkor tadbirda Yunusobod tumani soliq inspeksiyasining katta inspektori MChJ vakilidan 3,5 ming dollar olganida ushlangan.
Bu pullarga MChJda amalga oshirilishi rejalashtirilayotgan kameral tekshiruvda ijobiy xulosa berilishini ta’minlashni va’da qilgan.
Eslatib o‘tamiz, davlat soliq xizmati organlari tomonidan soliq to‘lovchilarning murojaatlari asosida faoliyati shubhali deb topilgan korxonalar bilan amalga oshirilgan bitimlarni o‘rganib chiqish uchun fevral oyidan buyon kameral soliq tekshiruvlari o‘tkazilmoqda.
