Ro‘ziqul Berdiyev: “1-turda ko‘rsatgan o‘yinimiz bizning eng yaxshi futbolimiz emasdi”

OFK Kubogi guruh bosqichi 2-turi doirasida bo‘lib o‘tadigan “Xo‘jand” — “Nasaf” bellashuvidan avval matbuot anjumani o‘tkazildi. Unda Qarshi klubi bosh murabbiyi Ro‘ziqul Berdiyev va yarim himoyachi Sherzod Nasrullayev ishtirok etdi.

Assalomu alaykum. “Xo‘jand” jamoasini yaxshi bilamiz. Ular ishtirokidagi o‘yinlarni ko‘rdik, o‘rgandik. Jamoa o‘z chempionatining yetakchilaridan biri. Ertaga kerakli natijaga erishishmiz uchun o‘zimizning eng yaxshi o‘yinimizni ko‘rsatishimiz kerak bo‘ladi. Futbolchilarim ertangi o‘yinga tayyor. O‘ylaymanki, ertaga ijobiy natija va ajoyib futbol uchrashuviga guvoh bo‘lamiz.

“Nasaf”ning guruhda g‘olib bo‘lishi uchun nima xalaqit berishi mumkinligi haqida

Tabiiyki raqiblar, asosan mezbonlar. 1-turning birinchi bo‘limida ko‘plab vaziyatlar yaratdik lekin foydalana olmadik. Ikkinchi bo‘limda birinchi golni urganimizdan so‘ng barcha tinchlandi va jamoa o‘z futbolini namoyish etishni boshladi. 1-turda ko‘rsatgan o‘yinimiz bizning eng yaxshi o‘yinimiz emasdi. Biz “Oloy” bilan bo‘lib o‘tgan o‘yinni tahlil qilib chiqdik va futbolchilarga uchrashuvdagi salbiy va ijobiy jihatlarni ta’kidlab o‘tdik. Biz ertaga o‘zimizning eng yaxshi o‘yinimizni ko‘rsatishga harakat qilamiz, ammo mezbonlar bunga yo‘l bermaslikka harakat qiladi. Biroq ijobiy natijaga erishish uchun eng yaxshi o‘yinimizni namoyish etishimiz kerak bo‘ladi.

1-turda “Oloy”ning asosan himoyada o‘ynagani, “Xo‘jand”da esa yuqori saviyali futbolchilar borligi haqida

“Oloy” asosan himoyaga urg‘u berdi, ko‘plab o‘yinchilar himoyada o‘ynadi. Menimcha, “Xo‘jand” ko‘proq hujum qiladi va oldinga o‘tadi. Bu biz uchun balki foydaga ishlar. Raqib himoyaviy o‘ynaydimi yoki hujumkormi farqi yo‘q, bunday bahslarga tayyor bo‘lishimiz shart. Hozir faqat “Xo‘jand” haqida gapiryapmiz, ammo “Oltin Asr” ham juda yaxshi jamoa. Guruhdagi hech bir bahs oson o‘tmaydi.

Musobaqa markazlashgan holda o‘tayotgani haqida

Hozir pandemiya bo‘lgani uchun musobaqa markazlashgan holda o‘tkazilmoqda. Bu OFK qarori. Bunga ko‘nikish kerak, OChL bahslari ham shunday o‘tdi. Oldin o‘yinlar uy-safar tizimida bo‘lardi.

Ro‘ziqul Berdiyev, “Nasaf” bosh murabbiyi

Avvalambor barchaga assalomu alaykum deyman. Ertangi o‘yin haqida gapiradigan bo‘lsam, barchamiz o‘yinga tayyormiz. G‘alaba qozonib, barcha muxlislarimizni xursand qilamiz degan umiddaman. “Xo‘jand” jamoasi o‘yinlarini o‘rganib chiqdik, ular g‘alaba uchun bor kuchini berishi aniq. Lekin biz ham g‘alaba qozonish uchun maydonga tushamiz.

Sherzod Nasrullayev, “Nasaf” yarim himoyachisi