Namanganda viloyati Yangiqo‘rg‘on tumani hokimi o‘rinbosari 10 ming dollar pora bilan ushlandi. Bu haqda “O‘zbekiston 24” telekanalining “Axborot 24” dasturida ma’lum qilindi.
DXX Namangan viloyati boshqarmasi, viloyat prokuraturasi va departament xodimlari tomonidan o‘tkazilgan tezkor tadbirda qishloq xo‘jaligi boshqarmasida ishlovchi shaxs 10 ming dollar pora bilan ushlangan. U Chortoq tumanida istiqomat qiluvchi xususiy tadbirkorga bog‘dorchilik bilan shug‘ullanishi uchun Yangiqo‘rg‘on tumanidan 10 gektar yer maydonini ajratish bo‘yicha tuman hokimi qarorini chiqarib berishini va’da qilgan.
Surishtiruv harakatlari davomida u pullarni Yangiqo‘rg‘on hokimi o‘rinbosariga berishi kerakligini aytgan. Tezkor tadbir davom ettirilib, tuman hokimi o‘rinbosari ham Namangan shahrida 10 ming dollarni olgan vaqtida qo‘lga tushgan.
“Tuman hokimi huzuridagi yer uchastkalarini berish masalalarini ko‘rib chiquvchi komissiya a’zosi sifatidagi vakolatlaridan foydalanishni rejalashtirgan ushbu yuqori lavozimli shaxs boshqa MChJga qarashli yer maydonidan 10 gektarni ajratib berishni maqsad qilgan”, — deydi DXX xodimi Mahliyo Valiqulova.
Avvalroq Jizzax shahar hokimining birinchi o‘rinbosari vazifasini bajaruvchi shaxs shahardagi ijtimoiy soha obyektlarida amalga oshiriladigan qurilish-ta’mirlash ishlari bo‘yicha o‘tkaziladigan tender savdolarini olib berish evaziga tadbirkordan 2 ming dollar pora olayotganda ushlangani haqida xabar berilgan edi. Undan avval esa Sirdaryo viloyatining Guliston tumani hokimi o‘rinbosari “ayollar daftari”ga kiritilgan fuqaroni arzonlashtirilgan uy oluvchilar ro‘yxatiga kirgizib qo‘yish uchun pora olayotgan vaqtida qo‘lga olingandi.
Izoh (0)