Toshket viloyatining Chirchiq shahrida joriy yilning 14—16-may kunlari Toshkent viloyati hokimligi va O‘zbekiston Yoshlar ishlari agentligi hamkorligida “Yangi O‘zbekiston yoshlari, birlashaylik!” festivali boshlanib, qizg‘in davom etmoqda.

Mazkur festivalda karantin qoidalariga to‘liq rioya qilingan holda, turli ko‘ngilochar shou-dasturlar, mashhur biznesmenlardan treninglar, sportchilardan master-klass, dizayner va moda defilelari namoyish etildi.

Festival ko‘ngilochar dasturlar bilan cheklanib qolmagan. Bu yerda yosh hunarmandlar festival ishtirokchilariga o‘z ijod ishlarining sirlarini namoyon qilish orqali ularni hunarga jalb eta olishdi.

Shuningdek, mehribonlik uylari tarbiyalanuvchilari, kam ta’minlangan, ehtiyojmand oila farzandlaridan iborat 50 nafar bola uchun “Sunnat to‘yi” aksiyasi o‘tkazildi.

Bo‘sh ish o‘rinlari yarmarkasida esa korxona va tashkilotlar 10 112 nafar bo‘sh ish o‘rni bilan qatnashayotgan bo‘lib, festivalning birinchi kunida 109 nafar yoshlarga o‘zi qiziqqan turli yo‘nalishlarga yo‘llanma berildi. Bundan tashqari, payvandlovchi, duradgorlik va tikuvchilik kabi kasblarga o‘qitish bo‘yicha yo‘llanmalar topshirildi.

Ta’kidlash joizki, yoshlarning bo‘sh vaqtini samarali tashkil etish maqsadida o‘tkazilayotgan ushbu ommaviy tadbir uchun intellektual o‘yinlar, raqs maydoni, ayollar uchun maxsus klub, gastronomik va bolalar shaharchasi barpo etilgan.

Festivalning ilk kunida O‘zbekiston Yoshlar ishlari agentligi direktori Alisher Sa’dullayev va Toshkent viloyati hokimi Davron Hidoyatov chiqish qilib, festivalni ochib berishdi.

 Toshkent viloyati hokimligi matbuot xizmati