Buxoro viloyatining Vobkent tumanida yashovchi fuqaro N.N. o‘ziga tegishli “KamAZ” yuk avtomashinasida svetoforning qizil chirog‘iga amal qilmay, harakatni davom ettirdi va 1-sinf o‘quvchisini urib yuborib, uning o‘limiga sabab bo‘ldi. Bu haqda “Daryo”ga viloyat IIB YHXB axborot xizmati rahbari Ulug‘bek Shukrullayev xabar berdi.
Ta’kidlanishicha, 2021-yilning 7-may kuni Vobkent tumanidan o‘tuvchi davlat ahamiyatiga ega 4R 220-avtomobil yo‘lining birinchi kilometrida YTH sodir bo‘lgan. 49 yoshli fuqaro N.N. o‘z boshqaruvidagi “KamAZ”da svetoforning qizil chirog‘iga amal qilmay, harakatlangan va yo‘lni kesib o‘tayotgan 2014-yilda tug‘ilgan yetti yoshli maktab o‘quvchisi B.J.ni urib yuborgan.
B.J. zudlik bilan Vobkent tuman markaziy shifoxonasiga og‘ir ahvolda keltirilgan. Ko‘rsatilgan tezkor tibbiy muolajalarga qaramay, maktab o‘quvchisi 7-maydan 8-mayga o‘tar kechasi vafot etgan.
Ayni paytda haydovchi qamoqqa olingan va unga nisbatan Jinoyat kodeksining 266-moddasi 2-qismi (transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilgan. Ushbu modda bilan ayblangan haydovchining aybi isbotlansa, qonunchilikka ko‘ra u o‘n yilgacha ozodlikdan mahrum qilinishi mumkin.
Hozirda holat yuzasidan dastlabki tergov harakatlari olib borilmoqda.
Avvalroq Qarshida sodir bo‘lgan YTHda 29 yoshli haydovchi va uning 5 yoshli qizi halok bo‘lgani, Buxoroda qarshisidagi mashinani quvib o‘tishga uringan Nexia traktorga borib urilgani va haydovchi shifoxonada vafot etgani to‘g‘risida xabar berilgandi.
Mavzuga doir:
- Farg‘onada 6 kishi halok bo‘lgan YTH tafsilotlari ma’lum bo‘ldi. Qurbonlar orasida 7 oylik chaqaloq ham bor
- Xorazmda haydovchilik guvohnomasi bo‘lmagan 10-sinf o‘quvchisi boshqaruvidagi Lacetti Damas’ga urildi. YTH oqibatida uch kishi halok bo‘ldi
- Qibrayda Damas va ”Jiguli” to‘qnashishi oqibatida bir kishi jarohat oldi
