Qashqadaryo viloyatining Qarshi tumanida sodir bo‘lgan YTHda 29 yoshli haydovchi va uning 5 yoshli qizi vafot etdi. Bu haqda “Daryo”ga viloyat Yo‘l harakati xavfsizligi boshqarmasi boshlig‘i axborot xizmati rahbari Javlon Baxtiyev ma’lum qildi.
Ma’lum bo‘lishicha, 2021-yil 4-may kuni soat taxminan 06:20 da 4R Qarshi—Beshkent—Kasbi—Koson yo‘lining 16 kilometrida 1992-yil tug‘ilgan va Mirishkor tumanining Guliston qishlog‘ida ro‘yxatda turuvchi U.M. boshqaruvidagi Nexia’da Qovchin qishlog‘i hududidan o‘tib ketayotib, boshqaruvni yo‘qotgan va yo‘ldan chiqib ketib daraxtga urilgan.
YTH oqibatida 29 yoshli haydovchi U.M. hodisa joyida vafot etgan.Uning avtomobilida birga ketayotgan 5 yoshli qizi F.F. esa og‘ir tan jarohati olib, ko‘rsatilgan tibbiy yordamga qaramasdan shifoxonada vafot etgan. Shuningdek, avtomobil salonida bo‘lgan haydovchining turmush o‘rtog‘i 1991-yilda tug‘ilgan U.I. hamda 7 yoshli o‘g‘li F.Z. og‘ir tan jarohati olib, shifoxonaga yotqizilgan.
Eslatib o‘tamiz, avvalroq Olmaliqda Damas velosipedchini urib yuborgani va jabrlanuvchi shifoxonada vafot etgani, Surxondaryoda esa 3 kishini urib yuborgan Damas haydovchisi voqea joyidan qochib ketishi oqibatida jabrlanganlarning ikki nafari vafot etgandi.
