Daniyaning Olborg shahri sudi ma’lumotlarni oshkor qilishda ayblangan 36 yoshli Rossiya fuqarosiga hukm chiqardi. Bu haqda Danmarks Domstoles nashriga tayanib Meduza xabar berdi.

Foto: Google Images

Sudya ayblanuvchi bir necha yildan buyon Daniya Texnika universiteti (DTU) va Shimoliy Yutlandiya kompaniyalari haqida ma’lumotlar to‘plagan, keyin ularni Rossiya razvedkasiga bergan, buning uchun ba’zan pul ham olgan, degan xulosaga keldi.

Rossiylik olimni uch yil muddatga ozodlikdan mahrum etish va Daniyaga qaytib kelishni taqiqlab, deportatsiya qilish belgilandi. Chiqarilgan hukmda ayblanuvchining mamlakatdan qachon chiqarib yuborilishiga aniqlik kiritilmagan.

Daniyadagi Rossiya elchixonasining “TASS” nashriga xabar berishicha, gap josuslikda ayblangan Aleksey Nikiforov haqida ketmoqda. Diplomatlarning qo‘shimcha qilishicha, u o‘z aybini tan olmadi va Daniya sudining qarori ustidan shikoyat kiritishni rejalashtirmoqda.

Avvalroq OAV Nikiforovning Daniya Texnologiya universitetida doktorlik darajasini himoya qilgan kimyogar olim ekanini ma’lum qilgan edi. 2019-yilning may oyidan boshlab u Olborg shahridagi metanol asosidagi yonilg‘ilarni yaratish va ishlab chiqish bilan shug‘ullanuvchi SerEnergy kompaniyasida o‘z faoliyatini boshlagan.

Avvalroq Rossiya Moskvadagi Bolgariya elchixonasining ikki xodimini va Italiya elchixonasining mudofaa va harbiy masalalar bo‘yicha harbiy attashesi yordamchisini persona non grata deb e’lon qildi va unga 24 soat ichida mamlakatdan chiqib ketishni buyurdi.

Shuningdek, Italiya karabinerlari tomonidan Rimda o‘tkazilgan maxsus operatsiya davomida Rossiya foydasiga josuslikda gumon qilingan ikki kishi hibsga olindi. La Repubblica gazetasining yozishicha, ulardan biri Italiya dengiz flotining katta ofitseri va fregat kapitani, ikkinchisi Rossiyaning Rimdagi elchixonasi harbiy xodimi bo‘lgan.

Bolgariya Tashqi ishlar vazirligi esa rossiyalik ikki nafar diplomatni persona non grata deb e’lon qildi va ularni mamlakatdan chiqarib yubordi.