Даниянинг Ольборг шаҳри суди маълумотларни ошкор қилишда айбланган 36 ёшли Россия фуқаросига ҳукм чиқарди. Бу ҳақда Danmarks Domstoles нашрига таяниб Meduza хабар берди.
Судья айбланувчи бир неча йилдан буён Дания Техника университети (ДТУ) ва Шимолий Ютландия компаниялари ҳақида маълумотлар тўплаган, кейин уларни Россия разведкасига берган, бунинг учун баъзан пул ҳам олган, деган хулосага келди.
Российлик олимни уч йил муддатга озодликдан маҳрум этиш ва Данияга қайтиб келишни тақиқлаб, депортация қилиш белгиланди. Чиқарилган ҳукмда айбланувчининг мамлакатдан қачон чиқариб юборилишига аниқлик киритилмаган.
Даниядаги Россия элчихонасининг «ТАСС» нашрига хабар беришича, гап жосусликда айбланган Алексей Никифоров ҳақида кетмоқда. Дипломатларнинг қўшимча қилишича, у ўз айбини тан олмади ва Дания судининг қарори устидан шикоят киритишни режалаштирмоқда.
Аввалроқ ОАВ Никифоровнинг Дания Технология университетида докторлик даражасини ҳимоя қилган кимёгар олим эканини маълум қилган эди. 2019 йилнинг май ойидан бошлаб у Ольборг шаҳридаги метанол асосидаги ёнилғиларни яратиш ва ишлаб чиқиш билан шуғулланувчи SerEnergy компаниясида ўз фаолиятини бошлаган.
Аввалроқ Россия Москвадаги Болгария элчихонасининг икки ходимини ва Италия элчихонасининг мудофаа ва ҳарбий масалалар бўйича ҳарбий атташеси ёрдамчисини persona non grata деб эълон қилди ва унга 24 соат ичида мамлакатдан чиқиб кетишни буюрди.
Шунингдек, Италия карабинерлари томонидан Римда ўтказилган махсус операция давомида Россия фойдасига жосусликда гумон қилинган икки киши ҳибсга олинди. La Repubblica газетасининг ёзишича, улардан бири Италия денгиз флотининг катта офицери ва фрегат капитани, иккинчиси Россиянинг Римдаги элчихонаси ҳарбий ходими бўлган.
Болгария Ташқи ишлар вазирлиги эса россиялик икки нафар дипломатни persona non grata деб эълон қилди ва уларни мамлакатдан чиқариб юборди.
Изоҳ (0)