Shavkat Mirziyoyev 10-may kuni “Ramazon hayitini nishonlash to‘g‘risida”gi PQ-5110-sonli qarorga imzo chekdi.
Qarorga ko‘ra, O‘zbekiston musulmonlari idorasining 2021-yilda Ramazon hayitining birinchi kuni 13-may — payshanba kuniga to‘g‘ri kelishi haqida qabul qilgan qarori inobatga olinib, mamlakatda 2021-yil 13-may Ramazon hayiti bayrami sifatida nishonlanishi belgilandi.
Shuningdek, Prezidentning 10-maydagi PF-6222-sonli farmoni asosida 2021-yil 14-may (juma) hamda 15-may (shanba) kunlari qo‘shimcha dam olish kuni deb e’lon qilindi.
Bundan kelib chiqib, o‘zbekistonliklar Ramazon hayiti munosabati bilan ketma-ket 4 kun dam oladigan bo‘ldi:
- 13-may, payshanba — Ramazon hayitining birinchi kuni (ishlanmaydigan bayram kuni);
- 14-may, juma — qo‘shimcha dam olish kuni (barcha uchun);
- 15-may, shanba — qo‘shimcha dam olish kuni (barcha uchun);
- 16-may, yakshanba — umumiy dam olish kuni.
Shuningdek, Qurbon hayiti munosabati bilan 20–22-iyul dam olish kunlari sifatida belgilandi (17-iyul va 24-iyul uchun dam olish kunlari ko‘chiriladi).
Bundan tashqari, qaror bilan 31-dekabr ham qo‘shimcha dam olish kuni etib belgilandi.
