Meksikalik Saul “Kanelo” Alvares (56-1-2, 38 KO) o‘zining professional boksdagi navbatdagi jangini Toshkent vaqti bilan 9-may, yakshanba kuni AQShning Arlington shahrida (Texas shtati) o‘tkazdi.
Alvaresga ushbu jangda britaniyalik Billi Jo Sonders (30-1, 14 KO) raqiblik qildi. Jangga Saulning super o‘rta vazn toifasidagi (-76,2 kg) WBC, WBO hamda Billining WBA Super chempionlik kamarlari qo‘yilgandi.
12 raundga mo‘ljallangan jang 8 raund davom etdi. Alvaresning raundlar davomida yo‘llagan kuchli zarbalari oqibatida Sondersning o‘ng ko‘zi deyarli ko‘rmay qoldi. Natijada Sonders 9-raundga chiqishdan bosh tortdi va Alvares texnik nokaut evaziga g‘alabani qo‘lga kiritdi.
Shu tariqa meksikalik bokschi uchta chempionlik kamarini o‘ziniki qildi. Bu orqali Saul Alvares professional boksdagi g‘alabalari sonini 56 taga yetkazdi. Billi Jo Sonders esa prof ringdagi ilk mag‘lubiyatini qabul qildi.
Alvares—Sonders jangini bu yerda tomosha qilish mumkin — video.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)