So‘nggi vaqtlarda Toshkent shahridagi suv tarmoqlari va oqova suv tarmoqlarining quduqlariga o‘rnatilgan lyuklarning o‘g‘irlanish holati ko‘paymoqda. Bu haqda “Toshkent shahar suv ta’minoti” MChJ matbuot xizmati xabar berdi.
Ma’lumotlarga ko‘ra, Toshkent shahrida 3 ming kilometrdan ortiq suv, qariyb 2 ming kilometrga teng oqova suv (kanalizatsiya) quvurlari mavjud. Manzillarga uzatilgan quvurlarni bir nuqtada bog‘lash uchun esa turli hajmdagi quduqlar o‘rnatilgan. Suv tarmoqlarida 32 mingdan ortiq, oqova suv tarmoqlarida esa 107 mingdan ko‘p quduq bor. Ularning har biriga lyuklar o‘rnatilgan.
“So‘nggi vaqtlarda ana shu lyuklarning yo‘qolish holatlari juda ko‘p uchramoqda, ya’ni o‘g‘irlab ketilmoqda. Masalan, so‘nggi paytlarda suv tarmoqlaridagi quduqlardan yiliga 2 mingtagacha, oqova suvlardan esa 3 mingtagacha ana shunday lyuklar yo‘qolmoqda”, — deyiladi xabarda.
Ta’kidlanishicha, lyuk jamlanmalari hajmiga ko‘ra o‘rtacha 575 ming so‘mdan 2 million so‘mgacha xarid qilinadi.
“Buning natijasida ‘Toshkent shahar suv ta’minoti’ga yiliga milliardlab mablag‘larni yo‘qotishiga to‘g‘ri kelmoqda. Aksariyat o‘g‘irlangan bu kabi lyuklar ikkilamchi metallarni qabul qiluvchi shoxobchalarga topshirib yuborilmoqda.
Qayd etilishicha, lyuklarni qisqa payvandlash ham natija bermay qo‘ygan.
“Xalqning mulkiga xiyonat qilib, arzimagan mablag‘ evaziga yon-atrofingizdagilarning ma’naviy va jisman hamda moddiy zarar ko‘rishlariga, qolaversa, soha korxonasining milliardlab mablag‘lari behuda sovurilishiga yo‘l qo‘yayotganlarga ko‘zingiz tushsa, bu haqda huquq-tartibot idoralariga xabar bering. O‘rinsiz zararlarning o‘rnini qoplashga sarflanayotgan mablag‘lar sohada xizmat sifatini yaxshilashga sarflansa, suv ta’minotidagi muammolar bir muncha kamaygan bo‘lardi”, — deyiladi xabarda.
Izoh (0)