Koronavirusga qarshi kurashish shtabi a’zosi, tibbiyot fanlari doktori Sevara Ubaydullayeva Zangiota yuqumli kasalliklar shifoxonasida davolanayotgan bemorlarga vaksina qilinadimi, degan savolga javob berdi.
Foto: “Daryo”
“Vaksinalar – kasallikning oldini olishga qaratilgan vositalar bo‘lib, ularni organizmga yuborish uchun inson o‘tkir yoki surunkali kasalliklardan butunlay davolanib, emlashni tinch davrda amalga oshirish kerak”, — degan u 26-aprel kuni COVID-19 bilan bog‘liq bugungi vaziyat, vaksinatsiya jarayonlariga tayyorgarlik mavzusiga bag‘ishlangan brifingda.
Sevara Ubaydullayevaning qayd etishicha, uni ikki xil vaqtda, ya’ni koronavirus infeksiyasi bilan umuman kasallanilmagan holatda yoki kasallikka chalingach 3, 6 yoki 9 oy o‘tib, qonda kasallikka qarshi ishlab chiqilgan antitanachalar titri kamaygan yoki umuman tushib ketgan holatlarda emlashni o‘tkazish tavsiya etiladi.
“Zangiota yuqumli kasalliklar shifoxonasida koronavirus bilan og‘ir holatda davolanayotgan bemorlar organizmiga, afsuski, infeksiya tushib bo‘lgan va kasallikning o‘tkir yoki o‘tkir osti davrida emlash tavsiya etilmaydi”, — degan Koronavirusga qarshi kurashish shtabi a’zosi.
Mart oyining o‘rtalarida Zangiota tumanidagi ixtisoslashtirilgan yuqumli kasalliklar shifoxonalarida bemorlar ko‘payib ketgani va bo‘sh o‘rinlar qolmagani haqida xabarlar paydo bo‘lgandi, Sog‘liqni saqlash vazirligi bu xabarni rad etib, kovid-kasalxonalarda “minglab bo‘sh o‘rinlar bor”ligini ma’lum qilgandi. Mart oyining oxirlarida mazkur tibbiyot muassasasining ikkinchi klasteri bosh shifokori Doniyor Mirazimov ushbu ko‘p tarmoqli yuqumli kasalliklar shifoxonasiga har kuni 50-60 kishi joylashtirilayotganini aytgandi.
Eslatib o‘tamiz, aholini koronavirusga qarshi emlash tadbirlari 1-apreldan boshlandi. 24-aprel holatiga ko‘ra, O‘zbekistonda koronavirus infeksiyasiga qarshi jami emlanganlar soni 550 ming kishiga yaqinlashdi. O‘zbekistonda koronavirusga chalingani rasman tan olinganlar soni 25-aprel holatiga ko‘ra 89 355 nafarga yetdi.
