Зангиота юқумли касалликлар шифохонасида даволанаётган беморларга вакцина қилинадими?

Коронавирусга қарши курашиш штаби аъзоси, тиббиёт фанлари доктори Севара Убайдуллаева Зангиота юқумли касалликлар шифохонасида даволанаётган беморларга вакцина қилинадими, деган саволга жавоб берди.

«Вакциналар – касалликнинг олдини олишга қаратилган воситалар бўлиб, уларни организмга юбориш учун инсон ўткир ёки сурункали касалликлардан бутунлай даволаниб, эмлашни тинч даврда амалга ошириш керак», — деган у 26 апрель куни COVID-19 билан боғлиқ бугунги вазият, вакцинация жараёнларига тайёргарлик мавзусига бағишланган брифингда.

Севара Убайдуллаеванинг қайд этишича, уни икки хил вақтда, яъни коронавирус инфекцияси билан умуман касалланилмаган ҳолатда ёки касалликка чалингач 3, 6 ёки 9 ой ўтиб, қонда касалликка қарши ишлаб чиқилган антитаначалар титри камайган ёки умуман тушиб кетган ҳолатларда эмлашни ўтказиш тавсия этилади.

«Зангиота юқумли касалликлар шифохонасида коронавирус билан оғир ҳолатда даволанаётган беморлар организмига, афсуски, инфекция тушиб бўлган ва касалликнинг ўткир ёки ўткир ости даврида эмлаш тавсия этилмайди», — деган Коронавирусга қарши курашиш штаби аъзоси.

Март ойининг ўрталарида Зангиота туманидаги ихтисослаштирилган юқумли касалликлар шифохоналарида беморлар кўпайиб кетгани ва бўш ўринлар қолмагани ҳақида хабарлар пайдо бўлганди, Соғлиқни сақлаш вазирлиги бу хабарни рад этиб, ковид-касалхоналарда «минглаб бўш ўринлар бор»лигини маълум қилганди. Март ойининг охирларида мазкур тиббиёт муассасасининг иккинчи кластери бош шифокори Дониёр Миразимов ушбу кўп тармоқли юқумли касалликлар шифохонасига ҳар куни 50-60 киши жойлаштирилаётганини айтганди.

Эслатиб ўтамиз, аҳолини коронавирусга қарши эмлаш тадбирлари 1 апрелдан бошланди. 24 апрель ҳолатига кўра, Ўзбекистонда коронавирус инфекциясига қарши жами эмланганлар сони 550 минг кишига яқинлашди. Ўзбекистонда коронавирусга чалингани расман тан олинганлар сони 25 апрель ҳолатига кўра 89 355 нафарга етди.