«Амалдорларнинг кўчмас мулклари ва машиналари тўғрисидаги маълумотлар очиқланиши керак» — адлия вазири Русланбек Давлетов

Адлия вазири Русланбек Давлетов ҳозир ҳам рақамлаштиришга қарши яширин қаршиликлар борлиги, бу биринчи навбатда эскича ишлашга ўрганган айрим мансабдорлар ва ташкилотларга тааллуқлилигини айтди. «Gazeta.uz»нинг хабар беришича, бу ҳақда у 22 апрель куни Tashkent Law Spring II халқаро юридик форумининг очилиш маросимида айтиб ўтди. Русланбек Давлетов карантинга олингани боис халқаро форумда онлайн тарзда иштирок этган.

«Албатта, жамият хоҳлаётган очиқлик, ҳисобдорлик, бюрократия ва коррупциядан холи бўлишни барча ташкилотлар бир хилда тушунмайди ва қабул қилмайди. Кўникмаган бу қадриятларга, — дея сўзида давом этди Давлетов, — Рақамлаштириш ва очиқлик эса улардан умуман янгича ишлашни талаб қилади. Биргина давлат харидларидаги очиқлик қанчалик бу иллатларга зарба бермоқда, биз буни олқишлаймиз, барибир энди замон бошқача, ташкилотлар ўзгармаса, халқ ишончини оқламайди, бу эса уларни шубҳасиз инқирозга етаклайди».

У бунинг учун барчага бирдек тушунарли бўлган ҳар бир соҳада очиқликни таъминлаш стандартлари яратилиши лозимлигини таъкидлади. Уларни ўқиган ҳар бир киши бир хилда тушуниб, тегишли талабни қўя олиши керак.

«Иккинчидан, худди шундай рақамлаштиришнинг минимал талаблари бўлиши керакки, ташкилотлар ўз фаолиятида шу дастурлардан минимал равишда фойдаланиши керак. Жамоатчилик ҳам талаб қила олиши керак», — деган Русланбек Давлетов.

Вазир Ўзбекистон учун рақамлаштириш ва очиқлик бўйича устувор соҳаларни белгилаб олиш кераклигига эътибор қаратган.

«Чунки йўналиш кўп, муаммо етарли, ресурслар танқислигини эътиборга олиб, энг биринчи навбатда қилиниши керак бўлган ва давлат томонидан молиялаштирилиши ва қўллаб-қувватланиши керак бўлган йўналишлар белгиланиши керак», — деган у, шунингдек, бу борада очиқланиши лозим бўлган бир қатор масалаларни санаб ўтган.

«Масалан, биринчи навбатда бюджет пулларининг сарфланиши очиқлигининг янги босқичи, айниқса, долзарб бўлган автомобиль йўлларига кетаётган харажатлар, аниқ манзиллари билан интерактив карталарда кўриниши керак, ҳар бир ташкилотнинг ўз маъмурий биноларини таъмирлашга кетказаётган харажатлари, амалдорларнинг кўчмас мулклари ва машиналари тўғрисидаги маълумотлар очиқланиши керак», — деган Давлетов.

У форумга ташриф буюрганларни мазкур жумбоқларни биргаликда ечиш, ўйлаш ва таҳлил қилиш учун Тошкент ҳуқуқ баҳори платформаси доирасида очиқ ва конструктив мулоқотга чақирган.

«Умуман, тўртинчи саноат инқилоби шароитида ҳуқуқий институтларга янгича назар ташлаш ва анъанавий ҳуқуқий механизмларни янги воқеликка изчил мослаштириш йўлларини биргаликда ўйлайлик», — деган адлия вазири.

Эслатиб ўтамиз, Коррупцияга қарши курашиш агентлиги амалдорларнинг даромадлари декларация қилинишини назарда тутувчи қонун лойиҳасини ишлаб чиқди. Ушбу қонун лойиҳасида мансабдор шахсларнинг барчаси даромадлари ва харажатларини декларациялаш назарда тутилган. Шунингдек, Президентга ҳам йил давомида ишлаб топган пули ҳақида ҳисобот топшириш мажбурияти юклатилиши мумкин. Қонун лойиҳаси 2021 йил 25 март куни Ўзбекистон Президенти Администрациясига киритилди.