Xitoy hukumati uchun lyuks avtomobillarni ishlab chiqarishga ixtisoslashgan Hongqi markasi Shanxayda L-Concept nomli konseptini taqdim etdi, deb xabar beradi Motor.
Hongqi L-Concept kompozit materiallardan ishlangan oq tom va ikki xil rangli kuzovga ega bo‘lgan. Avtomobilning an’anaviy orqa oynasi mavjud emas — uning o‘rnini rombsimon dekorli panel egallagan. Murakkab geometrik naqshlarni eshik kartlari va salonning old panellarida ham uchratish mumkin.
Shou-karning o‘ziga xos boshqa jihatlari — vertikal joylashgan old optika, katta radiator panjarasi, to‘rtta gorizontal diod chiziqlardan iborat fonarlar va harakat yo‘nalishiga qarshi ochiluvchi orqa eshiklar.
Hongqi (“qizil bayroq”) FAW Group konserniga tegishli bo‘lib, 1958-yildan buyon Xitoy elitasi uchun hashamatli avtomobillarni yaratib keladi.
Hongqi L-Concept saloni to‘q qizil va oq charm bilan qoplangan, yog‘och va silliqlangan alyuminiy bilan bezatilgan, pol qismiga junli gilamchalar to‘shalgan. Fastbekning ruli, shuningdek, old yo‘lovchi o‘rindig‘i yo‘q (shu bilan birga, o‘ng tarafda old panel mavjud). Yana bir e’tiborli jihati — orqa o‘rindiqlarni ajratib turuvchi qism shiftiga o‘rnatilgan billur qandil.
Hozircha Hongqi L-Concept’ga o‘rnatiladigan dvigatelga oid ma’lumotlar sir tutilmoqda. Xitoy OAVlarining yozishicha, ish konsept bilan cheklanmaydi: 2023-yilda noodatiy model seriyali versiyada ishlab chiqariladi.
Eslatib o‘tamiz, 2020-yilning yozida Hongqi markasi H9 flagman sedanining prays-listini e’lon qilgandi. Hashamatli to‘rt eshikli Hongqi narxi 330 ming yuanni (47 ming dollar) tashkil etmoqda — bu Mercedes-Benz E-Class’dan uch barobarga arzonroq.
Izoh (0)