“2024-yilgacha futbol klublari o‘ladi. Biz futbolni qutqarib qolmoqchimiz”. Florentino Peres Yevropa Superligasini tuzishga nima sabab bo‘lganini izohladi

“Real” klubi prezidenti va Yevropa Superligasi rahbari Florentino Peres madridliklar klubining yangi loyihaga nima sababdan kirgani haqida gapirdi.

Daromad ko‘rish uchun musobaqa doirasidagi o‘yinlarni ko‘paytirishdan o‘zga iloj qolmayapti, Superliga esa bizga pandemiya sabab ko‘rilgan zararlarni qoplashga yordam beradi. Biz ko‘proq katta o‘yinlar o‘tkazish orqali ko‘proq daromad qilishimiz kerak.

Hech qanday fitna bo‘lgani yo‘q, Italiya, Angliya va Ispaniyaning katta klublari bu yoqimsiz vaziyatda shu qarorni qabul qilishi kerak edi. “Real”ning o‘zi joriy mavsumda 400 million yevro yo‘qotdi.

Bizning hayot tarzimiz rivojlangani sari futbol ham rivojlanishi kerak. U hozirgi real hayotga moslashishi kerak. Bu yerda ko‘p gapirmoqchi emasman, biroq futbolga bo‘lgan qiziqish tushib ketishni boshladi. Auditoriya kamaymoqda, shu sabab audiovizual huquqlar ham tushib ketmoqda.

Futbol — butun jahon darajasidagi yagona sport turi. Televideniye o‘zgarishi kerak. Nima sabab 16—24 yosh atrofidagi odamlar futbolga qiziqmay qo‘yganini tahlil qilish lozim. Boshqa platformalar sabab faqat bir nechta o‘yinlargina qiziqishga sabab bo‘lmoqda. Nimanidir o‘zgartirish kerak.

Xuddi shunaqasi o‘tgan asrning 50-yillarida ham ro‘y bergan. UEFA va FIFA Santyago Bernabeu va Yevropa Chempionlari Kubogiga qarshi chiqqan. Bu o‘shanda e’tiborni tortganmidi? Katta jamoalarga o‘ynashga bering. Biz bu ishni futbol uchun qilyapmiz.

Barcha pulni translyatsiya qiladiganlar beradi. Aynan ular pul olib keladi. Bu pul hamma uchun, chunki yuqori darajadagi klublar ko‘proq pul topsa, u hammaga boradi. Sababi biz qolganlardan futbolchi sotib olamiz va bir-birimizga yordam beramiz.

“Sevilya” ham Superligada o‘ynashi mumkin. Beshta jamoa sport prinsiplari asosida qo‘shiladi. Bu ochiq musobaqa, yopiq emas. Biz sport prinsiplariga va jamoalar musobaqada qatnashish uchun kurashishiga ishonamiz.

UEFA ham bizni qo‘llab-quvvatlashi zarur. Agar biz ko‘proq pul ishlasak, bu faqat futbolning rivojiga xizmat qiladi. Iloji boricha tezroq boshlashni xohlaymiz. Barcha masalani FIFA va UEFA bilan muhokama qilishni rejalashtiryapmiz.

UEFA Chempionlar Ligasining yangi formati bo‘yicha ish olib bordi. Hurmatni saqlagan holda shuni aytmoqchiman, men bu formatga tushunmadim. Biz futbolni qutqarib qolmoqchimiz, futbolni qutqarish esa — barchani qutqarish degani. Yaqin 20 yil tinch o‘tishini va hech kim 200 million yevro yo‘qotmasligini tilayman.

Biz allaqachon ishdan chiqqan modelni o‘zgartirishni istaymiz. Hech kim yangi formatni tushunmayapti, 2024-yilga borib biz o‘lamiz (UEFA 2024-yildan Yevrokuboklar formati o‘zgartirilishini e’lon qildi — izoh “Daryo”). Klublar millionlab yevroni yo‘qotdi.

Florentino Peres, “Real” klubi va Yevropa Superligasi prezidenti