«2024 йилгача футбол клублари ўлади. Биз футболни қутқариб қолмоқчимиз». Флорентино Перес Европа Суперлигасини тузишга нима сабаб бўлганини изоҳлади

«Реал» клуби президенти ва Европа Суперлигаси раҳбари Флорентино Перес мадридликлар клубининг янги лойиҳага нима сабабдан киргани ҳақида гапирди.

Даромад кўриш учун мусобақа доирасидаги ўйинларни кўпайтиришдан ўзга илож қолмаяпти, Суперлига эса бизга пандемия сабаб кўрилган зарарларни қоплашга ёрдам беради. Биз кўпроқ катта ўйинлар ўтказиш орқали кўпроқ даромад қилишимиз керак.

Ҳеч қандай фитна бўлгани йўқ, Италия, Англия ва Испаниянинг катта клублари бу ёқимсиз вазиятда шу қарорни қабул қилиши керак эди. «Реал»нинг ўзи жорий мавсумда 400 миллион евро йўқотди.

Бизнинг ҳаёт тарзимиз ривожлангани сари футбол ҳам ривожланиши керак. У ҳозирги реал ҳаётга мослашиши керак. Бу ерда кўп гапирмоқчи эмасман, бироқ футболга бўлган қизиқиш тушиб кетишни бошлади. Audiтория камаймоқда, шу сабаб аудиовизуал ҳуқуқлар ҳам тушиб кетмоқда.

Футбол — бутун жаҳон даражасидаги ягона спорт тури. Телевидение ўзгариши керак. Нима сабаб 16—24 ёш атрофидаги одамлар футболга қизиқмай қўйганини таҳлил қилиш лозим. Бошқа платформалар сабаб фақат бир нечта ўйинларгина қизиқишга сабаб бўлмоқда. Ниманидир ўзгартириш керак.

Худди шунақаси ўтган асрнинг 50 йилларида ҳам рўй берган. УЕФА ва ФИФА Сантьяго Бернабеу ва Европа Чемпионлари Кубогига қарши чиққан. Бу ўшанда эътиборни тортганмиди? Катта жамоаларга ўйнашга беринг. Биз бу ишни футбол учун қиляпмиз.

Барча пулни трансляция қиладиганлар беради. Айнан улар пул олиб келади. Бу пул ҳамма учун, чунки юқори даражадаги клублар кўпроқ пул топса, у ҳаммага боради. Сабаби биз қолганлардан футболчи сотиб оламиз ва бир-биримизга ёрдам берамиз.

«Севилья» ҳам Суперлигада ўйнаши мумкин. Бешта жамоа спорт принциплари асосида қўшилади. Бу очиқ мусобақа, ёпиқ эмас. Биз спорт принципларига ва жамоалар мусобақада қатнашиш учун курашишига ишонамиз.

УЕФА ҳам бизни қўллаб-қувватлаши зарур. Агар биз кўпроқ пул ишласак, бу фақат футболнинг ривожига хизмат қилади. Иложи борича тезроқ бошлашни хоҳлаймиз. Барча масалани ФИФА ва УЕФА билан муҳокама қилишни режалаштиряпмиз.

УЕФА Чемпионлар Лигасининг янги формати бўйича иш олиб борди. Ҳурматни сақлаган ҳолда шуни айтмоқчиман, мен бу форматга тушунмадим. Биз футболни қутқариб қолмоқчимиз, футболни қутқариш эса — барчани қутқариш дегани. Яқин 20 йил тинч ўтишини ва ҳеч ким 200 миллион евро йўқотмаслигини тилайман.

Биз аллақачон ишдан чиққан моделни ўзгартиришни истаймиз. Ҳеч ким янги форматни тушунмаяпти, 2024 йилга бориб биз ўламиз (УЕФА 2024 йилдан Еврокубоклар формати ўзгартирилишини эълон қилди — изоҳ «Дарё»). Клублар миллионлаб еврони йўқотди.

Флорентино Перес, «Реал» клуби ва Европа Суперлигаси президенти