Olmaliqda sotuvchilarning buyumlarini tortib olgan uch nafar soliq xodimi ishdan bo‘shatildi va maxsus unvonlari bekor qilindi

Toshkent viloyati Olmaliq shahrida sotuvchilarning buyumlarini zo‘rlik bilan tortib olgan soliqchilar aks etgan video tarqalgandi. Ushbu holat yuzasidan Davlat soliq qo‘mitasi boshqarma boshlig‘i o‘rinbosari Muzaffar Nazarov “Zamon.uz”ga holat yuzasidan intervyu berdi.

Nazarovning ta’kidlashicha, videodagi holat Davlat soliq qo‘mitasining hozirgi siyosatiga umuman to‘g‘ri kelmaydi.

“Davlat soliq xizmati organlari fuqarolarga nisbatan hech qachon kuch ishlatishiga yo‘l qo‘yilmaydi. Bugungi kunda soliq organlari tadbirkorlarga ko‘makchi bo‘lib, ularning qonuniy faoliyat yuritishlarida amaliy yordam berishga doim harakat qiladi”, – deydi Muzaffar Nazarov.

Shuningdek, Muzaffar Nazarovning ma’lum qilishicha, ushbu holat yuzasidan Davlat soliq qo‘mitasi tomonidan tezkor ravishda xizmat tekshiruvi o‘tkazildi. Xizmat tekshiruvi natijalariga ko‘ra, voqea aybdorlari bo‘lgan uch nafar xodim egallab turgan lavozimidan ozod qilingan va barcha maxsus unvonlari bekor qilingan.

Bundan tashqari, Olmaliq shahar davlat soliq inspeksiyasining boshlig‘i, uning o‘rinbosari hamda Jismoniy shaxslarga xizmat ko‘rsatish bo‘limi boshlig‘iga ham tegishli intizomiy jazo choralari qo‘llanilgan.

Bundan avval Davlat soliq qo‘mitasi boshlig‘i Sherzod Kudbiyev Olmaliqda sotuvchilarning buyumlarini tortib olgan soliq xizmatchilari aks etgan video yuzasidan murojaat qilib, xalqdan bu voqea uchun uzr so‘ragandi.