Farg‘ona viloyatining Quvasoy shahrida joylashgan ko‘p qavatli uy xonadonlaridan birida gaz portladi. Bu haqda “Daryo”ga viloyat Favqulodda vaziyatlar boshqarmasi axborot xizmati xabar berdi.
Ma’lum qilinishicha, 2021-yil 11-aprel kuni soat 06:25 da Quvasoy shahar, “Ziynat” mahallasi, Azizov ko‘chasidagi ko‘p qavatli uyning xonadonlaridan birida gaz va havo aralashmasi chaqnashi natijasida portlash sodir bo‘lgan.
Voqea joyiga viloyat Favqulodda vaziyatlar boshqarmasining yong‘in-qutqaruv ekipajlari yetib borib, qutqaruv ishlarini amalga oshirgan.
Chaqnash oqibatida uy egasi turli darajada tan jarohati olib, shifoxonaga yotqizilgan.
Chaqnash binoning to‘rtinchi qavatida sodir bo‘lgani uchun qo‘shni 16 ta xonadonda yashovchi 36 nafar fuqaro hodisa oqibatlarini bartaraf etish ishlari yakunlangunga qadar yaqin qarindoshlarinikiga ko‘chirilgan.
Ta’kidlanishicha, xonadon tabiiy gazdan qarzdorligi sababli tarmoqdan uzib qo‘yilgan. Shunga qaramay, fuqaro A.I. yong‘in va texnika xavfsizligi talablarini qo‘pol ravishda buzib, o‘zboshimchalik bilan tarmoqqa rezina shlang orqali ulanib olgan.
Chaqnashning asosiy sababi tabiiy gazdan foydalanish qoidalarining buzilishi, deb taxmin qilinmoqda. Voqea joyiga tegishli idoralarning kuch hamda vositalari jalb qilinib, sodir bo‘lgan vaziyat oqibatlarini bartaraf etish bo‘yicha ishlar olib borilmoqda. Mas’ul tashkilotlar tomonidan binoning foydalanishga yaroqliligi o‘rganilmoqda.
Ayni paytda holat yuzasidan tergovga qadar tekshiruv ishlari olib borilmoqda.
Izoh (0)