Фарғона вилоятининг Қувасой шаҳрида жойлашган кўп қаватли уй хонадонларидан бирида газ портлади. Бу ҳақда «Дарё»га вилоят Фавқулодда вазиятлар бошқармаси ахборот хизмати хабар берди.
Маълум қилинишича, 2021 йил 11 апрель куни соат 06:25 да Қувасой шаҳар, «Зийнат» маҳалласи, Азизов кўчасидаги кўп қаватли уйнинг хонадонларидан бирида газ ва ҳаво аралашмаси чақнаши натижасида портлаш содир бўлган.
Воқеа жойига вилоят Фавқулодда вазиятлар бошқармасининг ёнғин-қутқарув экипажлари етиб бориб, қутқарув ишларини амалга оширган.
Чақнаш оқибатида уй эгаси турли даражада тан жароҳати олиб, шифохонага ётқизилган.
Чақнаш бинонинг тўртинчи қаватида содир бўлгани учун қўшни 16 та хонадонда яшовчи 36 нафар фуқаро ҳодиса оқибатларини бартараф этиш ишлари якунлангунга қадар яқин қариндошлариникига кўчирилган.
Таъкидланишича, хонадон табиий газдан қарздорлиги сабабли тармоқдан узиб қўйилган. Шунга қарамай, фуқаро А.I. ёнғин ва техника хавфсизлиги талабларини қўпол равишда бузиб, ўзбошимчалик билан тармоққа резина шланг орқали уланиб олган.
Чақнашнинг асосий сабаби табиий газдан фойдаланиш қоидаларининг бузилиши, деб тахмин қилинмоқда. Воқеа жойига тегишли идораларнинг куч ҳамда воситалари жалб қилиниб, содир бўлган вазият оқибатларини бартараф этиш бўйича ишлар олиб борилмоқда. Масъул ташкилотлар томонидан бинонинг фойдаланишга яроқлилиги ўрганилмоқда.
Айни пайтда ҳолат юзасидан терговга қадар текширув ишлари олиб борилмоқда.
Изоҳ (0)