Farg‘onada ehtiyotsizligi oqibatida 4 yashar bolaning bir ko‘zidan ayrilishiga sababchi bo‘lgan bog‘cha tarbiyachisiga sud hukmi bilan jazo tayinlandi. Bu haqda “Daryo”ga Jinoyat ishlari bo‘yicha O‘zbekiston tuman sudi raisi Shuhrat Mirzakirov ma’lum qildi.
Ma’lum bo‘lishicha, 2020-yil 16-oktabr kuni O‘zbekiston tumanidagi 13-oilaviy nodavlat maktabgacha ta’lim tashkilotida yordamchi tarbiyachi bo‘lib ishlagan G.U. bog‘cha tarbiyalanuvchilariga ovqat tarqatayotgan vaqtida bolalar baqir-chaqir qilgan. Tarbiyachi ularni tinchlantirish maqsadida qo‘lidagi temir qoshiqni stolga urgan. Tarbiyachining qo‘lidan chiqib ketgan qoshiq 2016-yilda tug‘ilgan H.I.ning ko‘z qismiga teggan.
Sud-tibbiy ekspertizasining 2020-yil 20-oktabr kungi xulosasiga ko‘ra, voyaga yetmagan H.I.da o‘ng ko‘z shox pardasining, skleraning, rangdor pardaning yirtilgan yarasi — o‘ng ko‘z olmasi butunligining buzilishi, ko‘rishning to‘liq yo‘qolishi kabi og‘ir tan jarohati borligi aniqlangan.
Qayd etilishicha, 2021-yilning 19-fevral kuni Jinoyat ishlari bo‘yicha O‘zbekiston tuman sudi tomonidan Jinoyat kodeksining 104-moddasi 1-qismi (qasddan badanga og‘ir shikast yetkazish) bilan G.U.ni ayblash haqidagi jinoyat ishi ko‘rib chiqilgan.
Sud hukmiga ko‘ra, G.U.ga nisbatan e’lon qilingan ayblov Jinoyat kodeksining 111-moddasi 2-qismiga qayta kvalifikatsiya qilingan. Sudlanuvchi Jinoyat kodeksining 111-moddasi 2-qismi (ehtiyotsizlik orqasida badanga og‘ir shikast yetkazish) bilan aybli deb topilib, unga ish haqining 20 foizini davlat daromadi hisobiga ushlab qolgan holda 2 yil axloq tuzatish ishlari jazosi tayinlangan.
Shuningdek, fuqaroviy javobgar 13-oilaviy nodavlat maktabgacha ta’lim tashkilotidan 4 million 700 ming so‘m moddiy zarar jabrlanuvchining qonuniy vakili foydasiga undirilishi belgilangan.
Mavzuga doir:
Izoh (0)