Farg‘ona viloyatining Quva tumanida niqob taqqan bir guruh shaxslar tomonidan sodir etilgan bosqinchilik jinoyati qisqa muddatda fosh etildi. Bu haqda “Daryo”ga viloyat IIB axborot xizmati xabar berdi.
Qayd etilishicha, 2021-yilning 30-mart kuni soat 00:50 da uch nafar noma’lum shaxs yuziga niqob taqqan holda tumandagi mahallalarning birida yashovchi Ya.A.ning yashash xonadoniga g‘ayriqonuniy ravishda bostirib kirgan.
Bosqinchilar xonadon egasining yotoqxonada uxlab yotgan qizi Yu.O. va uning turmush o‘rtog‘i Yu.F. tanasining turli joylariga hayoti yoki sog‘lig‘i uchun xavfli bo‘lgan usulda qo‘llari bilan urib, pul berishini talab qilgan. Ammo Yu.F. ularning biriga faol qarshilik ko‘rsatgan. Bosqinchilardan biri sherigini qutqarish uchun o‘tkir tig‘li jism bilan qurollanib, Yu.F.ga tan jarohati yetkazgan va hodisa joyidan yashiringan.
Mazkur holat yuzasidan Quva tumani IIB huzuridagi tergov bo‘limi tomonidan Jinoyat kodeksining 164-moddasi 3-qismi “v”, “g” bandi (uy-joyga g‘ayriqonuniy ravishda kirgan holda bosqinchilik qilish) bilan jinoyat ishi qo‘zg‘atilgan.
Farg‘ona viloyati IIB JQB va Quva tuman IIB xodimlari tomonidan olib borilgan tezkor qidiruv harakatlari davomida ushbu jinoyatni Q.N., Q.M. va O.A. sodir etgani aniqlanib, protsessual tartibda ushlangan.
Hozirda mazkur holat yuzasidan tergov harakatlari davom etmoqda.
Mavzuga doir:
- Farg‘onada xonadonlarning biriga bostirib kirib, er-xotinga hujum qilgan shaxslar hodisa joyida qoldirib ketilgan kurtka sabab topildi
- Zangiotada uxlab yotgan er-xotinga o‘roq bilan jarohat yetkazib, xonadondan mashina va boshqa buyumlarni o‘g‘irlab ketgan shaxs ushlandi
- Namanganda Xitoy fuqarolariga nisbatan bosqinchilik sodir etib, ularning qariyb 20 ming dollar pulini qo‘lga kiritgan shaxslar ushlandi
Izoh (0)