Samarqand viloyatida Qo‘shrabot tumanida Nexia rusumli quvib o‘tishga uringan Spark haydovchisi yo‘l chetida harakatlanayotgan piyodani urib yubordi, deb xabar beradi IIV YHXBB axborot xizmati.

Kadr: Telegram

Ma’lum qilinishicha, 29-mart kuni tumanning “Qo‘ralos” mahallasi hududidan o‘tuvchi Marjonbuloq—Qo‘shrabot—Zarminot yo‘nalishli 4R-43 avtomobilining 107-kilometrida 62 yoshli haydovchi Spark avtomobilida quvib o‘tish qoidalarini buzgan holda yo‘lning qarama-qarshi harakatlanish bo‘lagi chekka qismida bo‘lgan 56 yoshli ayolni urib yuborib, YTH sodir etgan.

Jabrlanuvchi ayol olingan tan jarohatlari oqibatida voqea joyida vafot etgan.

Mazkur holat yuzasidan haydovchiga nisbatan Jinoyat kodeksining tegishli moddasi bilan jinoyat ishi qo‘zg‘atilgan.

Avvalroq Qarshida ikki nafar piyodani urib yuborib, voqea joyidan ketib qolgan Сobalt haydovchisi 15 sutkaga qamalgani, Navoiyda yo‘lni kesib o‘tayotgan mast piyodani Damas urib ketgani, Namanganda Isuzu yuk mashinasi piyodani urib yuborishi oqibatida jabrlanuvchi shifoxonada vafot etgani to‘g‘risida xabar berilgandi.