Backstreet Boys: 90-yillarning eng mashhur guruhi xonandalari qay darajada o‘zgardi? (foto va video)

Ommabop guruh 1993-yil Florida shtatining Orlando shahrida tashkil topgan. Dastlab guruh tarkibida uchta ijrochi – Ey Jey Maklin, Nik Karter va Xaui Dorou bor edi. Yangi musiqiy guruh tashkil topishi haqida eshitgan yigitlar darhol tanlovda ishtirok etgan va guruhga qabul qilingan.

Yigitlar tez orada Kevin Richardson haqida xabar topadi, so‘ngra uning amakivachchasi Barayan Littrellni ham guruhga qo‘shadi. Ular guruh nomini Backstreet Boys deb nomlashga qaror qilgan. Chunki ular tez-tez aynan shu nom bilan mahalliy bozorda vaqt o‘tkazar edi.

Tez orada guruh, klub, restoran, ko‘rgazma, savdo markazlari va boshqa joylarda o‘z chiqishlarini boshladi.

Guruh tashkil topganidan so‘ng bir yil o‘tib, ular Jive Records kompaniyasi bilan shartnoma imzolaydi va eng mashhur qo‘shiqlarni taqdim etadi. 1996-yilda guruhning birinchi albomi chiqqan, bu ularga muvaffaqiyatni mustahkamlash va mashhurlikka erishishga sabab bo‘ldi.

Musiqachilar dunyo bo‘ylab sayohat qilar, yangi taronalar va kliplar suratga olishar edi. Guruhning ikkinchi “Millennium” albomi “Gremmi”ning beshta nominatsiyasiga sazovor bo‘ldi. 2001-yilda guruh ijodiy tanaffusga chiqqanini e’lon qilganida ular aynan mashhurlik cho‘qqisida edi. Bir necha yil mobaynida ijrochilar alohida karyerasini shakllantirishga harakat qildi, ammo ular yana qayta birlashdi.

Backstreet Boys eng kuchli va iste’dodli guruhlardan biri. Ular hali ham qo‘shiq kuylash va albomlar taqdim etishdan to‘xtagani yo‘q. 2019-yilda guruhning navbatdagi – DNA deb nomlangan albomi chiqdi.

Ey Jey Maklin

Maklin san’at olamiga ikki yoshidan kirib kelgan. O‘sha vaqtdayoq u moda namoyishlari hamda teatr tomoshalarida ishtirok etgan. U 9 yoshga to‘lganida “Haqiqat yoki jur’at” filmida bosh qahramon sifatida rol ijro etgan. Keyinchalik u oilasi bilan Orlandoga ko‘chib ketadi va u yerda ham turli tanlovlarda ishirok etgan. Bu vaqtda u guruhning bir qismi sifatida mashhurlikka ham erishib bo‘lgan edi. Maklin 2000-yillarga kelib, o‘zining kareyrasini boshladi. Ba’zida u Johnny No Name taxallusi ostida ham ijod qilar edi. U mustaqil ravishda bir necha albom chiqargan bo‘lsada, guruhdan ajralmadi. Shuningdek, u hayotining bir qismida spirtli ichimlik va giyohvandlikka ham berildi. Ammo o‘zida kuch topib, bunga qarshi kurashdi. Endilikda u xayriya ishlari bilan shug‘ullanadi va muammoga duch kelgan insonlarga yordam qo‘lini cho‘zadi. 2001-yilda u sevgilisi Roshel Karidis bilan turmush qurgan va juftlikning ikki nafar farzandi bor.

Nik Karter

Nik yoshligida aktyor bo‘lishni orzu qilgan, shuning uchun ham kastinglarda ishtirok etgan. 1990-yilda esa “Edvard qo‘l-qaychi” filmida rol ijro etishga muyassar bo‘lgan. Ammo bir necha yil o‘tgach, Nik guruh qo‘shiqchisiga aylandi va dunyo bo‘ylab mashhurlikka erishdi. 2002-yil guruh karyerasida tanaffus qilganda, Nik o‘zining birinchi “Now or Never” diskini taqdim etdi. Ko‘p o‘tmay yangi albom ustida ish boshlagan Nik 2010-yilga kelib, uni tugatishga muvaffaq bo‘ldi. Bundan tashqari, u bir necha filmlarda ham rol ijro etdi. U ham boshqa hamkasblari singari xayriya ishlari bilan shug‘ullanadi va atrof-muhitni muhofaza qilish muammolariga e’tibor beradi. Nik Karter aktrisa va fitness murabbiyi Loran Kitt bilan turmush qurgan va ularning ikki nafar farzandi bor.

Xaui Dorou

Xaui ham yoshligdan ijod olamida bo‘lib, teatr tomoshalarida ishtirok etgan. U guruh a’zosiga aylangunga qadar turli tanlovlarda qatnashgan. Lekin unga muvaffaqiyatni aynan Backstreet Boys guruhi keltirgan. 2011-yilda Xaui o‘zining birinchi “Back to Me” yakkaxon albomini taqdim etgan. Yigit prodyuserlik va xayriya ishlari bilan shug‘ullanadi. Musiqachining singlisi volchanka kasalligi bilan vafot etganidan so‘ng u ushbu kasallikni o‘rganuvchi va bemorlarga yordam ko‘rsatuvchi Dorough Lupus Foundation jamg‘armasiga asos soldi. 2007-yilda esa sevgilisi Li Boniello bilan turmush qurgan va hozirda ikki nafar o‘g‘lini tarbiyalab kelmoqda.

Kevin Richardson

Bolaligidanoq san’at olamida bo‘lgan Kevin Orlandoga ko‘chib o‘tganidan so‘ng “Uolt Disney Jahon madaniyat markazi”da ekskursiya bo‘yicha rahbar bo‘lib ishlagan. Uning hayoti guruh a’zosiga aylanganidan keyin butunlay o‘zgarib ketgan. Ammo tanaffusdan keyin Kevin guruhga qaytishni istamadi va o‘zi yakkaxon tarzda ijod qilishni ma’qul ko‘rdi. O‘tgan vaqt mobaynida u o‘zini aktyor sifatida ham sinab ko‘rdi. 2012-yilga kelibgina u guruhga qaytishga qaror qildi. U ham do‘stlari singari xayriya ihslari bilan shug‘ullanadi. Saraton bilan kasallanganlarga yordam beradi, sababi otasi ham aynan shu kasallik tufayli vafot etgan. Kevin aktrisa Kristin Key Uillits bilan turmush qurgan va ikki nafar o‘g‘il farzandni tarbiyalamoqda.

Brayan Littrell

1993-yili Kevin amakivachchasini guruhning beshinchi a’zosi sifatida taklif qilgan. Brayan yoshligida tug‘ma yurak nuqsoni bilan tug‘ilgan va shifokorlar uning omon qolishiga ishonmagan. Ammo Brayan kasallikka dosh bera oldi va buning uchun Yaratgandan doim qarzdorligini tan oladi. Keyinchalik u ham hamkasblari singari xayriya ishlari bilan shug‘ullandi va yurak xastaligi bilan og‘rigan bemorlarga yaqindan yordam beradigan “Sog‘lom qalblar klubi” fondini yaratdi. Shuningdek, u tabiiy ofat qurbonlari, muhtojlar, nogiron va yetim bolalarga ham yordam beradi. U 20 yildan buyon aktrisa Lienn Uolles bilan baxtli hayot kechirib kelmoqda.