Qozog‘istonlik dijey yilning eng yaxshi remiksi uchun “Gremmi” mukofotini qo‘lga kiritdi

Amerika musiqa mukofoti − “Gremmi” laureatlari e’lon qilindi.

Yilning eng yaxshi taronasi Billi Aylishning “Everything I Wanted”, eng yaxshi albomi esa – Teylor Sviftning “Folklore” to‘plami deb topildi. Qozog‘istonlik dijey Imanbek Zeykenov “Roses” treki remiksi uchun mazkur mukofotga sazovor bo‘ldi.

Los-Anjelesda AQSh Milliy san’at va fanlar akademiyasining 63-“Gremmi” taqdirlash marosimi bo‘lib o‘tdi. Tadbir onlayn olib borildi.

“Yil taronasi” nominatsiyasida Billi Aylish “Everything I Wanted” taronasi bilan g‘olib bo‘ldi. Shuningdek, ijrochining Jeyms Bond haqidagi “O‘lishning vaqti emas” filmi uchun kuylagan “No Time to Die” ijrosi “Eng yaxshi saundtrek” nominatsiyasida mukofotga loyiq deb topildi.

Teylor Svift “Folklore” to‘plami bilan “Yil albomi” nominatsiyasi bo‘yicha “Gremmi”ni qo‘lga kiritdi. “Yil qo‘shig‘i” nominatsiyasida afroamerikalik Jorj Floyd xotirasiga bag‘ishlangan “I Can’t Breathe” kompozitsiyasi muallifi − xonanda H.E.R. g‘olib bo‘ldi.

Qozog‘istonlik 20 yoshli dijey – Imanbek Zeykenov amerikalik reper Saint Jhn’ning “Roses” kompozitsiyasi remiksi uchun “Gremmi” g‘olibi bo‘ldi. U mukofotni qo‘lga kiritgan ilk qozog‘istonlik bo‘lib, uning versiyasidagi trek 20 haftadan ko‘proq ketma-ket Billboard Hot 100’ning eng yaxshi o‘ntaligiga kirgan. Imanbek aslida professional musiqachi emas. Ma’lum bo‘lishicha, u musiqa bilan shug‘ullanishdan avval Pavlodar viloyatida temiryo‘l xodimi bo‘lib ishlagan.

“Gremmi-2021” laureatlari

• Yil taronasi – “Everything I Wanted” (Billi Aylish);
• Yil qo‘shig‘i – “I Can’t Breathe” (H.E.R.);
• Yil albomi – “Folklore” (Taylor Svift);
• Eng yaxshi yangi ijrochi – Megan Thee Stallion;
• Eng yaxshi yakkaxon pop-ijrochi – “Watermelon Sugar” (Harry Styles)
• Eng yaxshi pop-duet yoki guruh ijrosi – “Rain On Me” (Ledy Gaga, Ariana Grande);
• Eng yaxshi an’anaviy vokal albom – “American Standard” (Jeyms Taylor);
• Eng yaxshi pop-vokal albom – “Future Nostalgia” (Dua Lipa);
• Eng yaxshi raqs taronasi – “10%” (Kaytranada, Kali Uchis);
• Eng yaxshi raqs/elektron albom – “Bubba” (Kaytranada);
• Eng yaxshi zamonaviy cholg‘u albomi – “Live At The Royal Albert Hall” (Snarky Puppy);
• Eng yaxshi rok-ijro – “Shameika” (Fiona Apple);
• Eng yaxshi metal-ijro – “Bum-Rush” (Body Count);
• Eng yaxshi rok-qo‘shiq – “Stay High” (Brittani Govard);
• Eng yaxshi rok-albom – “The New Abnormal” (The Strokes);
• Eng yaxshi alternativ albom – “Fetch The Bolt Cutters” (Fiona Apple);
• Eng yaxshi R&B-qo‘shiq – “Black Parade” (Beyonse);
• Eng yaxshi an’anaviy R&B ijrochi – “Anything For You” (Ledisi);
• Eng yaxshi R&B-albom – “Bigger Love” (John Legend);
• Eng yaxshi rep ijrochi – “Lockdown” (Anderson .Paak);
• Eng yaxshi rep/qo‘shiq bo‘yicha hamkorlik – “Savage” (Megan Thee Stallion, Beyonse);
• Eng yaxshi rep – “Savage” (Megan Thee Stallion, Beyonse);
• Eng yaxshi rep-albom – “King’s Disease” (Nas);
• Eng yaxshi kantri-qo‘shiq – “Crowded Table” (The Highwomen);
• Eng yaxshi kantri-albom – “Wildcard” (Miranda Lambert).