Yer yuzidagi odamlar yashaydigan eng xavfli hududlar (foto)

Sayyorada hayot uchun xavfli bo‘lgan joylar ko‘plab topiladi. Tashqaridan vahimali ko‘ringani, u yerda yashashni tasavvur qilib bo‘lmagani bilan mahalliy aholi u yerni tark etishga chog‘lanmaydi.

Yerdagi eng sovuq joy — Oymakon

Rossiya tarkibidagi Yoqutiston Respublikasining Oymakon qishlog‘ida havo harorati qish kunlari 64 daraja ayrim vaqtlarda esa 77 darajagacha sovuq, yoz kunlari bo‘lsa 34 darajagacha isishi mumkin. Qishloqda yuzdan ortiq aholi yog‘ochdan yasalgan uylarda yashaydi. Harorat 50 darajadan pasayadigan bo‘lsa, maktablar yopiladi. Mahalliy aholi tabiiy shubalar, qalin kiyimlar kiyadi. Haddan ortiq sovuqligi, mashinalarning qotib qolishi mumkinligi va boshqa bir qancha muammolarga qaramay, mahalliy aholi oila a’zolari bilan bu yerda yashashda davom etadi.

Balandligidan kislorod yetmaydigan joy — La-Rinkonada

Dengiz sathidan 5 ming balandlikda joylashgan Perudagi, La-Rinkonada shahrida o‘simliklarni uchratish mumkin emas. Qoyalardan iborat mazkur hududda kislorod tanqisligi sabab, odam nafas olishga qiynalishi mumkin. Iqlim va maishiy muammolarning borligi mahalliy aholi sonini ko‘paymasligiga sabab bo‘lolmaydi. Shahar aholisining soni so‘nggi vaqtda ikki karraga ko‘paygan va bugungi kunda 50 ming kishini tashkil qiladi.

Odamlar “igna ustidagidek” yashaydigan Sumatra oroli

Yerning yorig‘ida joylashgan mazkur hudud yashash uchun eng xavfli joylardan biri sanaladi. Bu yerda 8 ballgacha yer silkinishi, vulqonlar otilishi, dovullar ko‘plab kuzatilishi mumkin. Shunga qaramasdan Sumatra orolida 50 milliondan ortiq “metin asabli” odamlar yashaydi. Indoneziyaning boshqa Yava orolida esa Merapi vulqoni aholini tonusda ushlab turadi. Merapidan 7 yilda bir marta katta, 1 yilda ikki marta mayda vulqonlar otilib turishi hammasi emas, tutun parchalari har kuni chiqib turadi.

Ulkan echkiemarlar oroli — Komodo

Komodo oroli uzunligi 3 metr, og‘irligi 180 kilogramm tashkil qiladigan echkiemarlar ko‘pligi bilan mashhur. Aholining soni 2000, bunday bahaybat echkiemarlar esa 1700 nafarni tashkil qiladi. Ular uchun deyarli 80 yil avval qo‘riqxona tashkil etilgan bo‘lib, u keyinchalik YuNESCO’ning jahon merosi ro‘yxatiga kiritilgan. Sakraydigan, yuguradigan, suzadigan va quyoshda toblanadigan hayvonlarning odamlarga tashlanishi ham ehtimoldan holi emas. Shunga qaramay, mahalliy aholining mazkur orolni tark etish niyati yo‘q.

Qumdan iborat posyolka— Shoyna

Rossiyadagi Shoyna posyolkasida yashovchi aholining har tongi uylarini qumdan kavlab olishdan boshlanadi. Ayrimlar uy derazasidan tashqariga chiqishi mumkin, ammo har ehtimolga qarshi uyning tom qismida ham tashqariga chiqish uchun tuynuklar bor. Soni 200 nafarni tashkil qiladigan aholi muntazam ravishda binolarni kavlab olishga allaqachon ko‘nikkan.

Yomg‘irlar qishlog‘i — Mosinram

Hindistonda joylashgan Mosinram qishlog‘i Ginnesning rekordlari kitobiga sayyoradagi eng nam ob-havoli joy sifatida kiritilgan. Ko‘pchilikka yog‘ingarchilikning haddan ortiq bo‘lishi noqulaylik keltirib chiqarilganiga qaramay, Mosilyamda yashovchi odamlar bunga odatiy holdek qaraydi va bundan unumli foydalanishga harakat qiladi. O‘ziga xos o‘simliklar o‘sadigan va bambukli zontlar o‘rnatilgan qishloq aholisini shamollash aslo cho‘chitmaydi. Namlikning yuqori ekani sabab qishloq xo‘jaligi bo‘lmagan hududda yomg‘ir asosan yoz va erta kuzda ko‘p bo‘ladi.

Qaynaydigan ko‘l 

Markaziy Afrikadagi Kivu ko‘li va uning atrofi go‘zalligi bilan sayyohlarni o‘ziga maftun qiladi. 2 millionni tashkil qiladigan aholi ekzotik baliqlari bor mazkur ko‘lda cho‘milishi, baliq tutishi mumkin. Ammo olimlarni suv havzasi ostida metan va uglerod dvuokisi borligi xavotirga soladi. Yer silkinadigan bo‘lsa sunami, otilishlar yoki boshqa inson hayoti uchun xavfli hodisalar yuz berishi mumkin. Bunday voqea 1948-yilda yuz bergan bo‘lib, unda ko‘ldagi suv qaynay boshlagan, qattiq talofat ko‘rmagan aholi tabiat tomonidan “pishirib berilgan” (suv qaynaganida baliqlarning pishib qolgani nazarda tutilyapti) baliqlarni iste’mol qilgan. Gaz to‘planishining davom etgani sabab olimlar ushbu holat takrorlanishidan qo‘rqadi, ammo mahalliy aholi odatiy turmush tarzini kechirishda davom etadi.

Radiatsiyali hudud — Chernobil

1986-yilda Chernobildagi AES avariyasidan keyin 30 kilometrlik hududdan jami 115 000 kishi butunlay ko‘chib ketgan. Zararlanish xavfi hali yana uzoq vaqt yuqori bo‘ladigan hududda yashashda davom etayotgan kishilar ham yo‘q emas. Olimlar, radiatsiya darajasini kuzatuvchi ilmiy xodimlar bilan jami 80 nafar inson istiqomat qiladi.

Telefondan foydalanish taqiqlangan qishloq — Kifuka

Kongo demokratik respublikasidagi qishloq 970 metr balandlikdagi tog‘da joylashgan. Aholi turmush tarzi va salomatligini saqlash maqsadida mazkur qishloqda telefon, planshet va boshqa shu kabi narsalardan foydalanish taqiqlanadi. Gap shundaki, ushbu qishloqda muntazam ravishda yashin urishi odatiy hol bo‘lgan anomal hudud mavjud.

Tornadolar xiyoboni

Yer yuzida shamol 400 km/soat tezlikda esishi mumkin bo‘lgan joy bor. AQShdagi Texas, Oklaxoma, Kanzas, Nebraska, Janubiy Dakota, Kolorado singari hududlar tornado xiyoboni deb ataladi. Bu yerdagi uylar mustahkamlik standartlariga to‘g‘ri kelishi, tornadodan saqlanish mumkin bo‘lgan boshpanasi bo‘lishi kerak. Ogohlantirish tizimi tashkil qilingan hududdagi har bir fuqaro xavfsizlik qoidalarini yaxshi biladi va unga rioya qiladi. Chunki bu yerda boshqachasiga yashab bo‘lmaydi.