O‘zbekiston va Turkiya harbiylari Termizda tajriba almashadi

Termizda O‘zbekiston va Turkiya harbiylari hamkorligida maxsus-taktik o‘quv jarayonlari boshlandi. Bu haqda Mudofaa vazirligi matbuot xizmati xabar berdi.

Qayd etilishicha, 22-mart kuni Janubi-g‘arbiy maxsus harbiy okrug Janubiy operativ qo‘mondonligi Termiz dala-o‘quv maydonida O‘zbekiston va Turkiya mudofaa vazirlarining ikki tomonlama harbiy hamkorlik rejasiga asosan mazkur mamlakatlar Qurolli Kuchlarining maxsus bo‘linmalari bilan hamkorlikdagi maxsus-taktik o‘quvining tantanali ochilish marosimi bo‘lib o‘tdi.

Tadbirda O‘zbekiston Mudofaa vazirligi boshqarma boshlig‘i polkovnik Laziz Usmonov, Janubiy operativ qo‘mondonligi boshlig‘i polkovnik Po‘lat Sativaldiyev va Turkiya maxsus operatsiya kuchlari brigadasi komandirining o‘rinbosari polkovnik Rushtu To‘redi va ikki davlat harbiy xizmatchilari ishtirok etdi.

Dala-o‘quv maydonida harbiy xizmatchilar tajriba almashish uchun 15 kilometr majmuaviy maxsus-taktik yo‘lagidan o‘tish, jangovar ikkilik, uchlik va to‘rtlik tarkibida yaqin jang elementlari bo‘yicha ko‘rgazmali amaliy maxsus o‘q otish va qiyin sharoitlarda yashovchanlik holatlari bo‘yicha amaliy mashg‘ulotlarga jalb etilgan.

Shuningdek, poligonda ishtirokchilar maxsus-taktik o‘quvi savollari bo‘yicha mashg‘ulotlar olib borgan hamda o‘zbek va turk harbiylari o‘rtasida sport musobaqalari o‘tkazilgan.

Vazirlikning bildirishicha, hamkorlikdagi maxsus-taktik o‘quv mashg‘ulotlari 27-martga qadar davom etadi.

Eslatib o‘tamiz, 17-mart kuni Shavkat Mirziyoyev “Xalqaro shartnomalarni tasdiqlash to‘g‘risida”gi qarorni imzolagandi. Qaror bilan 2020-yil 27-oktabrda Toshkent shahrida imzolangan O‘zbekiston va Turkiya hukumatlari o‘rtasida harbiy-moliyaviy hamkorlik to‘g‘risidagi bitim hamda moliyaviy ko‘makni amalga oshirish to‘g‘risidagi bayonnoma tasdiqlandi.

Har ikki hujjat 2020-yil 27-oktabrda Turkiya milliy mudofaa vaziri Hulusi Akarning Toshkentga tashrifi chog‘ida imzolangan.