Energetika vazirligi O‘zbekistonda kuzatilayotgan kuchli shamol elektr uzatish tarmoqlariga ham shikast yetkazayotganini, oqibatda ayrim hududlarda elektr energiyasi ta’minotida uzilishlar kuzatilayotganini ma’lum qildi.

Foto: Energetika vazirligi matbuot xizmati

FVV xabariga ko‘ra, 18-martdan 20-martgacha respublikaning ayrim hududlarida shamol tezligi 17-22 metr/sekunddan 23-28 metr/sekundgacha kuchayishi kutilmoqda.

Oqibatda ayrim hududlarda yuqori va past kuchlanishli elektr uzatish tarmoqlariga ham shikast yetib, elektr energiyasi ta’minotida uzilishlar kuzatilmoqda.

Energetika vazirligi hozirda maxsus brigadalar tomonidan ushbu nosozliklarni bartaraf etish ishlari olib borilayotganini bildirgan.

Eslatib o‘tamiz, 18-mart kuni Sirdaryoning ikki tumanida kuzatilgan kuchli shamol oqibatida ayrim binolar tom qismi qulab tushgan, bir qator mahallalar elektr energiyasidan vaqtincha uzilgandi.

“O‘zgidromet” ham haftaning ikkinchi yarmida shamol tezligi kuchayib, ayrim joylarda kuchli yomg‘ir yog‘ishini ma’lum qilgan.