Hozir dunyoda xorijiy sayyohlar uchun koronavirus bilan bog‘liq cheklovlarsiz faqat beshta mamlakat mavjud. Shuningdek, 69 ta mamlakat avvalgidek kirish uchun yopiq. Ushbu ma’lumot Jahon sayyohlik tashkiloti (UNWTO) tomonidan berilgan hisobotda e’lon qilindi. Bu haqda “Tangritravel.kz” xabar berdi.
To‘liq ochiq mamlakatlar ro‘yxatiga Albaniya, Dominikan Respublikasi, Tanzaniya, Kosta-Rika va Shimoliy Makedoniya kirdi. 73 ta davlat chegaralarini qisman yopgan. Yettita mamlakat koronavirus testi manfiy bo‘lganlarni qabul qiladi. Yana 70 ta davlat karantinda bo‘lish yoki COVID-19 uchun manfiy test natijalarini talab qiladi.
Sayyohlar uchun butunlay yopiq bo‘lgan 69 ta mamlakatning 30 tasi Osiyo-Tinch okeani mintaqasida, 15 tasi Yevropada, 11 tasi Afrikada, 10 tasi Amerikada, uchtasi Yaqin Sharqda joylashgan.
Shuningdek, tadqiqotlar sayohatlarga cheklovlar qo‘yishda hukumatlar tomonidan aniqroq qarorlar qabul qilish tendensiyasini aniqladi.
“Cheklovlar — shunchaki muammo yechimining bir qisimi. Cheklovlar joriy qilishda eng so‘nggi ma’lumotlar va tahlillardan foydalanish zarur. Bunday yondashuv millionlab korxonalar va ishchilar bog‘liq bo‘lgan sektorni xavfsiz tarzda va mas’uliyat bilan qayta izga solishni ta’minlaydi”, — dedi UNWTO bosh kotibi Zurab Polilikashvili.
Avvalroq Xalqaro havo transporti assotsiatsiyasi (IATA) 2021-yilda sayyohlar 2020-yil oxiriga nisbatan kamroq parvoz qila boshlagani haqida xabar bergan edi. Ommaviy emlashlar tobora kuchayib borayotganiga qaramay, virusning yangi shtammlari cheklovlar kuchayishiga sabab bo‘lmoqda.
Izoh (0)