Soliq qo‘mitasining QQS bo‘yicha tekshiruvida 492,8 mlrd so‘mlik soxta operatsiyalar amalga oshirilgani tasdiqlandi

Davlat soliq qo‘mitasi tomonidan soliqlarni kamroq to‘lash maqsadida pul mablag‘larini naqdlashtirish bilan shug‘ullanuvchi 396 ta korxonadan iborat shubhali kontragentlar reyestri tuzilgan, shuningdek, “naqdlashtiruvchi korxonalar” xizmatlaridan foydalangan 10 mingga yaqin tashkilotlar ro‘yxati shakllantirilgan edi. Qo‘mitaning ma’lum qilishicha, faoliyati shubhali deb topilgan korxonalar bilan amalga oshirilgan bitimlarni o‘rganib chiqish uchun tezkor ravishda kameral soliq tekshiruvlari tashkil etilmoqda.

Ta’kidlanishicha, 20-fevral holatiga ko‘ra, respublika bo‘yicha jami 2358 ta korxonada 528,5 milliard so‘mlik asossiz hisobga olingan qo‘shilgan qiymat solig‘i (QQS) summalariga aniqlik kiritish bo‘yicha kameral soliq tekshiruvlari yakunlangan.

Natijada:

• 2216 ta, ya’ni 94 foiz korxonada (492,8 milliard so‘m) soxta operatsiyalarni amalga oshirish faktlari tasdiqlangan;
• 57 ta, ya’ni 2,4 foiz (8,1 milliard so‘m) tashkilotda QQS summasini noqonuniy hisobga olish fakti qisman tasdiqlangan;
• 85 ta, ya’ni nazorat tadbirlari o‘tkazilgan 3,6 foiz soliq to‘lovchilar tomonidan 27,6 milliard so‘mlik QQS summasini to‘g‘ri hisobga olganligi holatlari bo‘yicha asoslovchi hujjatlar taqdim etilgan. Shu sababli ulardan ortiqcha olingan mablag‘larni qaytarish bo‘yicha tezkor jarayonlar boshlangan.

Shuningdek, 118 ta korxona tomonidan QQS summasini to‘g‘ri hisobga olish bilan bog‘liq yo‘l qo‘yilgan boshqa huquqbuzarliklar ham aniqlanib, ularga nisbatan 5,3 milliard so‘mlik soliqlar qo‘shimcha hisoblangan.

Eslatib o‘tamiz, qo‘mita soliq to‘lovchilar uchun 18-fevraldan boshlab qo‘mitada ham, barcha soliq idoralarida ham faoliyat ko‘rsatuvchi ishchi guruhlarini tuzdi. “Naqdlashtiruvchi korxonalar” bilan moliyaviy operatsiyalarni amalga oshirgan tadbirkorlar kameral tekshiruv o‘tkazish bo‘yicha murojaat qilishlari mumkin.

Qo‘mita natijalar to‘g‘risida ijtimoiy tarmoqlar orqali har kuni hisobot bermoqda. Xususan, 17-fevral kuni 17 ta korxonada o‘tkazilgan soliq nazorati tadbirlarining dastlabki natijalariga ko‘ra, 16 ta korxona yoki 94,1 foiz hollarda soxta operatsiyalarni amalga oshirish faktlari tasdiqlangan. 18-fevral kuni esa 14 ta holatdan 12 tasi tasdiqlangan.